Në Gjenova të Italisë është hedhur një hap i rëndësishëm në drejtim të forcimit të bashkëpunimit strategjik mes Shqipërisë dhe Italisë në sektorin detar. Në ambientet e Divizionit të Anijeve Detare të kompanisë prestigjioze italiane Fincantieri është nënshkruar Akti i Themelimit dhe Statuti i shoqërisë “Fincantieri Albania”, me seli në Vlorë.
Sipas ministrit të Mbrojtjes, Ermal Nufi, krijimi i kësaj shoqërie përfaqëson një investim të rëndësishëm për zhvillimin e industrisë detare shqiptare dhe hap një kapitull të ri në bashkëpunimin ekonomik e strategjik mes dy vendeve. Partneriteti pritet të sjellë transferim të teknologjisë, rritje të kapaciteteve prodhuese, zhvillim të aftësive profesionale dhe krijim të vendeve të reja të punës në Shqipëri.
Ministri Nufi theksoi se Shqipëria po vijon të ndërtojë marrëdhënie të qëndrueshme me liderët ndërkombëtarë të industrisë, duke synuar rritjen e vlerës së shtuar për ekonominë kombëtare dhe forcimin e kapaciteteve në fushën e sigurisë. Me seli në Vlorë, “Fincantieri Albania” synon të shërbejë si një pikë e re zhvillimi për sektorin detar shqiptar, duke lidhur ekspertizën italiane me potencialet dhe burimet njerëzore vendase.
Postimi i plotë
Në Gjenova të Italisë në Divizionin e Anijeve Detare të kompanisë Fincantieri u hodh një hap i rëndësishëm drejt forcimit të bashkëpunimit strategjik mes Shqipërisë dhe Italisë, me nënshkrimin e Aktit të Themelimit dhe Statutit të shoqërisë “Fincantieri Albania”, me seli në Vlorë. Ky partneritet përfaqëson një investim të rëndësishëm në zhvillimin e industrisë detare shqiptare, transferimin e teknologjisë, krijimin e vendeve të reja të punës dhe rritjen e kapaciteteve prodhuese në vend. Shqipëria vazhdon të ndërtojë partneritete të qëndrueshme me liderët ndërkombëtarë të industrisë, duke krijuar vlerë të shtuar për ekonominë dhe sigurinë kombëtare.