Takimi i kryeministrit Edi Rama këtë të mërkurë në Kuç të Vlorës me kryetarët socialistë të bashkive që pritet të preken nga Reforma Territoriale është shoqëruar me debate të forta dhe përplasje. Rama një diskutim të fortë e pati me kryetarin e Bashkisë së Poliçanit, Adriatik Zotkaj.
Gjatë debatit, Rama i është drejtuar Zotkajt me fjalët se ai nuk duhej të ishte pjesë e mbledhjes, duke kritikuar edhe qëndrimin e Bashkisë së Poliçanit kundër reformës. ”Ti nuk duhet të ishe fare këtu. Ajo që bëri Poliçani me djegien e kartave ishte një akt paturpësie”, mësohet t’i ketë thënë Rama kryebashkiakut sipas ”Report TV”.
Zotkaj i cili ka kundërshtuar publikisht shkrirjen e Bashkisë së Poliçanit, ka mbrojtur qëndrimin e tij duke argumentuar se ndryshimi i hartës territoriale rrezikon të sjellë largimin e shërbimeve nga qytetarët. Tensione janë shënuar edhe gjatë debatit me kryetaren e Bashkisë së Dimalit, Juliana Memaj. Rama i është drejtuar me ironi drejtuesve vendorë, ndërsa Memaj është përgjigjur duke kritikuar hapësirën e kufizuar që, sipas saj, u ka mbetur bashkive për të ushtruar kompetencat e tyre.
“Ç’udhëheqës zeza! Ne jemi bërë si punëtorë komunaleje”, ka deklaruar Memaj, duke iu referuar mungesës së kompetencave të pushtetit vendor. Përplasja ka vijuar me largimin e saj nga mbledhja.
Debate janë zhvilluar edhe me kryetarët e Bashkive të Selenicës dhe Divjakës, Nertil Bello dhe Josif Gorrea. Të dy kanë kundërshtuar propozimet për shkrirjen e bashkive që drejtojnë, duke argumentuar kundër ndryshimeve të parashikuara në kuadër të reformës territoriale.
Në diskutime është përfshirë edhe ministri i Shtetit për Pushtetin Vendor, Arbjan Mazniku. Sipas pretendimeve të bëra gjatë mbledhjes, Rama ka akuzuar kryebashkiakët kundërshtues se po nxisin komunitetet lokale kundër reformës.