Kreu i Lëvizjes “Shqipëria Bëhet”, Adriatik Lapaj, ka treguar detaje nga shoqërimi i tij në polici gjatë protestës së zhvilluar të martën para Kuvendit. Lapaj tha se ndërhyri pasi gazetari Shpend Gashi po merrej me forcë nga persona civilë. Sipas tij, situata nisi kur gazetari shkoi të ndihmonte një grua që po shtyhej nga protestuesit. “Gazetari Shpendi shkoi të ndihmonte një grua që po shtyhej. Dikush e kap nga qafa zotin Gashi, se e kapën prej gryke. Kjo nuk është diçka që e parashikon ligji. Unë shoh që po më vjen shteti”.
Lapaj tha se rreth tij ishin rreth 20 persona civilë dhe ngriti pikëpyetje mbi mënyrën e ndërhyrjes së tyre. “Nuk bëhet kjo që 20 punonjës civilë vijnë e marrin zvarrë një gazetar, një pedagog apo një qytetar të thjeshtë. Nuk po flas për punonjësit e zakonshëm të policisë. Po flasim për ata që janë infiltrime të krimit në strukturat e larta të policisë”,-tha për ”News 24”. Ai e cilësoi ndërhyrjen e tij si të ligjshme dhe tha se qëllimi ishte mbrojtja e qytetarëve.
“Me kaq vite, s’kam shkelur kurrë ligjin. E njoh mirë atë dhe limitin e ligjit. Ndërhyrja ime ishte brenda ligjit, për të mbrojtur disa qytetarë nga disa civilë që po e merrnin zvarrë”. Duke folur për mundësinë e shoqërimeve apo arrestimeve të tjera, Lapaj u shpreh se kjo nuk do ta ndalë lëvizjen dhe protestat. “Ne e kemi ndarë mendjen, jo vetëm unë. Mund të na shoqërojnë, të na arrestojnë çdo ditë, hall është që të arrestojnë për vjedhjen e lekëve të ilaçeve, aty është turp. Por të arrestojnë se proteston kundër hajdutëve, është dekoratë”.
Lapaj tha se protestat do të vijojnë dhe i bëri thirrje qytetarëve të reagojnë ndaj asaj që ai e cilëson si abuzim me paratë publike. ”Unë shkoj në protestë si qytetar. Mendoj se është gjëja më e mirë që mund të bëjnë të gjithë, t’i hedhim dru asaj flakës së lirisë. Në Shqipëri po instalohet kultura e protestës përballë hajdutëve”.