Partia Socialiste dega Tiranë feston sot 35-vjetorin e themelimit të saj, në një aktivitet të zhvilluar në Pallatin e Kongreseve. Gjatë fjalës së tij, kryeministri Edi Rama u ndal te historiku dhe identiteti i Partisë Socialiste, duke theksuar se formimi i saj lidhet me një proces reflektimi dhe ndryshimi.
Gjatë fjalës së tij, Rama u shpreh se socialistët nuk janë “si ata të tjerët” dhe pikërisht për këtë arsye nuk e konsiderojnë çështjen e Veliajt si një kauzë politike. Ai pranoi se mungesa e tij mund të jetë e dhimbshme dhe se situata mund të perceptohet si e padrejtë nga mbështetësit e tij, por nënvizoi se objektivi kryesor është ndërtimi i një Shqipërie më të mirë për brezat e ardhshëm. Rama kujtoi periudhën kur ish-kryeministri dhe ish-kryetari i PS-së, Fatos Nano u burgos, duke e cilësuar atë si një figurë me kontribut të rëndësishëm për partinë dhe shtetin.
”Kryetarin e vet e pati në burg për disa vite, politikisht të dënuar. Fatos Nano ka një kontribut të jashtëzakonshëm, sepse doli nga burgu duke kërkuar shtet jo hakmarrrje, me sensin e tij të lidershipit dhe përgjegjësisë. Më besoni që nuk ka qeveri që hyri në histori se ndërtoi rrugë, një qeveri hyn në histori përsa ka kapacitet të ndërtojë shtet. Sot ne jemi këtu në 35-vjetorin e PS-së së Tiranës, pikërisht sepse nuk jemi si ata të tjerët. Nuk jemi duke kërkuar lirimin e të burgosurit Erion Veliaj, sepse kjo nuk është çështja jonë. Sado e padrejtë të na duket ne, jemi këtu për t’i lënë fëmijëve tanë një Shqipëri tjetër”, tha Rama.
