Tradita e dhurimit vullnetar të gjakut në mjediset e Kryeministrisë vijoi edhe këtë vit, si një akt simbolik dhe solidar për të shpëtuar jetë. Kryeministri Edi Rama, dhurues i rregullt i gjakut prej shumë vitesh, iu bashkua sërish kësaj nisme së bashku me punonjës të administratës së Kryeministrisë.
“Kryeministria si çdo vit për nismën e dhurimit të gjakut”, shkruan Rama në rrjetet sociale ndërsa ka shpërndarë edhe një foto ku dhuron gjak.
Punonjës të institucioneve qendrore dhe vendore i janë bashkuar fushatës intensive të Ministrisë së Shëndetësisë dhe Mirëqenies Sociale për dhurim vullnetar të gjakut në ndihmë të fëmijëve talasemikë dhe të gjithë atyre që kanë nevojë jetike për gjak.
Edhe këtë vit fushata sensibilizuese e dhurimit të gjakut synon të ndërgjegjësojë për rolin e rëndësishëm që luajnë dhurimet vullnetare të gjakut në shpëtimin e jetëve dhe rritjen e solidaritetit brenda komuniteteve.