Kryeministri Edi Rama ka reaguar dje në rrjetin social, Facebook mbi ngjarjet e fundit në vend. Ai ka folur për videoskandalin në spital, ryshfetet e truprojës së ministres së Arsimit, si dhe përplasjet e bandave në mes të Tiranës. Kryeministri tha se në çdo rast shteti tregoi gatishmëri dhe reagoi në kohë reale. Lidhur me akuzat e Partisë Demokratike, Rama shprehet se përgjigja më e mirë janë shifrat nga puna e Policisë së Shtetit. “Videoja e xhiruar në mjediset e QSUT? E turpshme dhe e dënueshme! Reagimi i shtetit i menjëhershëm. Autorët po vihen përpara përgjegjësisë penale. Rasti i truprojës së ministres që kërkoi ryshfet për të emëruar një mësues? I turpshëm dhe i dënueshëm. Reagimi i shtetit i menjëhershëm. Autori i larguar brenda orës nga ministrja dhe pastaj edhe nga Garda e Republikës. Sot përpara përgjegjësisë penale”,- tha Rama. Kryeministri ka vlerësuar reagimin e Policisë së Shtetit. “Ngjarjet kriminale në Tiranë? Pa asnjë dyshim reagimi i shtetit ishte përsëri i menjëhershëm. Por ndryshe nga dy rastet e mësipërme, kërkohen hetime, prova, dëshmi e me radhë, gjëra për të cilat Policia e Prokuroria po bashkëpunojnë papushim”,- tha ai. Ndërsa ka shtuar se aludimet e PD-së janë shpifje që hedhin baltë mbi punën e Policisë së Shtetit. “Të turpshme të gjitha aludimet e shtrembërimet mediatike dhe lëre pastaj shpifjet monstruoze të PD! Përpjekja për të bindur opinionin se krimi po bën kërdinë deri dhe në mes të Tiranës, përveçse me gjendjen e pashpresë të PD lidhet në fakt, drejtpërdrejt, edhe me arritjet serioze të Policisë së Shtetit. Flasin shifrat, flet puna, flet rritja e respektit të qytetarëve për uniformat blu”,- tha Rama. Sipas tij, “ngjarje të rënda apo të shëmtuara, krimesh apo korrupsioni, ka pasur e do të ketë, në Shqipëri si në çdo vend të Europës. Por ajo që ka rëndësi është reagimi i shtetit, rritja e zbulueshmërisë dhe ndëshkueshmërisë”. Pas deklaratave të Ramës nuk ka vonuar reagimi i kreut të opozitës. “U bëmë si në vendet e humbura të Amerikës Latine, atentate, vrasje dhe pushtetarë të pafytyrë që luajnë në të dyja krahët”,- shkruan Basha. Kreu i PD-së shprehet se “kjo është qeveria e standardeve të dyfishta, por burgun e paska për popullin, jo për bandat. Bandat që shëtisin me antitank, kapen dhe lirohen. A mund të lirohet dikush pa u bërë ekspertiza e armëve të gjetura?- ka ngritur pikëpyetjen kryedemokrati duke theksuar në përfundim se “organizatat kriminale kontrollojne sot qeverinë, ministrat dhe pjesë të organeve të rendit. Krimi ka kapur shtetin.”