Kryeministri Edi Rama u është përgjigjur ditën e sotme kritikëve lidhur me paketën e maleve, për të cilën edhe protestuesit kanë kërkuar shfuqizuar anulimin, me argumentin se përmes saj po shitet Shqipëria.
Në një deklaratë të bërë sot, Rama tha se ligji për paketën e maleve nuk do të anulohet, duke e mbrojtur atë si një mundësi për emigrantët dhe pronarët e tokave në zonat malore që duan të investojnë, me synim zhvillimin e turizmit dhe ekonomisë.
“Në Shqipëri ka disa territore, në mënyrë të posaçme në veriun e vendit, ku banorët, komunitetet nuk e kanë njohur, pranuar ligjin e ndarjes së tokës. Për këtë arsye, ata kanë ndarë tokën mes veti, sepse me 7501-n, nuk kanë ndarë se çfarë kanë pasur në të shkuarën.
Këtu nuk jemi në kushtet kur shiten malet. Këtu jemi në kushtet kur malet po hapen për ata që kanë trashëguar një pronë në këto zona. Jemi në kushtet kur njerëz që kanë një pemëtore, e mirëmbajnë prej vitesh dhe nuk kanë mundësi të pajisen me dokumentacionin përkatës për arsyet që kam përmendur, mund të marrin një leje për të zhvilluar aktivitet agropërpunues.
Jemi në kushtet kur mijëra emigrantë kanë shprehur interes, sepse duan të investojnë. Turizmi do të bëhet një sektor gjithnjë e më i rëndësishëm i ekonomisë. “Paketa e Maleve” është një politikë për njerëzit, për të drejtën e pronës dhe zhvillimin e saj. Është një politikë që u shkon për shtat atyre që, për vite me radhë, nuk kanë mundur ta kthejnë pronën në një aset financiar.
Çfarë do të thotë të anulohet “Paketa e Maleve”? Do të thotë që këta njerëz të mbeten pezull, vetëm sepse disa të tjerë, që malet i shohin nga qyteti, e kundërshtojnë atë. Nuk kam parë asnjë komunitet të prekur të dalë e të thotë se kjo paketë po ua merr pronat. Përkundrazi, ata mezi e presin. Kjo është rezultat i shumë bisedave dhe përpjekjeve; nuk është diçka që lindi sa hap e mbyll sytë. Në tregun e fjalëve shitet si një tjetër akt tradhtie. Unë tradhtar? Kjo është një temë tjetër”, tha Rama.