Kreu i Partisë Demokratike, Sali Berisha, zhvilloi në Korçë takimin e radhës në kuadër të “Foltores së Riorganizimit” të PD, ku kritikoi ashpër qeverinë dhe kryeministrin Edi Rama.
Gjatë fjalës së tij, Berisha deklaroi se Rama gëzon, sipas tij, nivelin më të lartë të pakënaqësisë qytetare në historinë e vendit. Ai iu referua edhe protestave kundër kryeministrit, duke përmendur rastet kur Rama është qëlluar me vezë dhe domate gjatë aktiviteteve publike. “Rama është sot njeriu më i urryer i kombit në histori”, deklaroi Berisha.
Ish-kryeministri u ndal më tej te gjendja ekonomike dhe sociale e qytetarëve, duke kërkuar që opozita të përqendrohet te problematikat që prekin drejtpërdrejt shqiptarët. Sipas Berishës, shqiptarët përballen me varfëri dhe paga të ulëta krahasuar me vendet e tjera europiane.
Një pjesë të fjalës së tij ai ia kushtoi edhe pensionistëve dhe vështirësive që, sipas tij, hasin për të siguruar medikamentet e nevojshme. “Mijëra pensionistëve u kushtojnë jetën sëmundjet, pasi nuk marrin dot ilaçet”, u shpreh Berisha, duke ngritur shqetësimin për aksesin e kësaj kategorie në trajtimin mjekësor.