Albert Vataj
Shëngjini ka çelur zyrtarisht sezonit turistik për vitin 2026, përmes një mbrëmjeje festive që ka bërë bashkë qytetarët, operatorët ekonomikë dhe personalitete të larta nga Shqipëria e Kosova. Lajmi është bërë i ditur nga Kryebashkiaku i Lezhës, Pjerin Ndreu, i cili ka ndarë në rrjetet sociale atmosferën elektrizuese të një nate që shënon fillimin e asaj që pritet të jetë një verë mjaft premtuese për turizmin vendas.
Nën logon e promovimit të gjithë potencialit turistik të zonës, Shëngjini u shndërrua mbrëmjen e djeshme në një panair të madh ku harmonizoheshin tradita, arti dhe argëtimi.
Mbrëmja festive dëshmoi edhe një herë rëndësinë strategjike që Lezha dhe Shëngjini kanë në hartën turistike rajonale. Në këtë event morën pjesë figura të rëndësishme politike dhe diplomatike, duke treguar një mbështetje të gjerë institucionale. Ndër ta, Ministri i Bujqësisë, Andis Salla; Ministri i Mbrojtjes, Ermal Nufi; si dhe Kryetari i Komisionit të Ligjeve, Ulsi Manja. E nderuan këtë sofër të mikpritjes, Ambasadori i Kosovës në Tiranë, Skënder Dyrmishi, së bashku me kryetarët e komunave të Deçanit dhe Klinës, Bashkim Ramosaj dhe Zenun Elezi, duke ritheksuar lidhjen e fortë të pushuesve nga Kosova me bregdetin e Shëngjinit.
Kryetari i Bashkisë Pogradec, Ilir Xhakolli, dhe ai i Malësisë së Madhe, Tonin Marinaj, të cilët iu bashkuan festimeve krahas qindra qytetarëve dhe përfaqësuesve të bizneseve lokale, ishin pjesë e kësaj kremte festive.
Hapja e sezonit nuk ishte thjesht një ceremoni zyrtare, por një pasqyrë e qartë e asaj që Lezha ofron për vizitorët vendas dhe të huaj. Përgjatë pedonales dhe hapësirave publike, suksesi i këtij fillim-sezoni u prezantua përmes pesë shtyllave kryesore.
Njësitë akomoduese dhe hotelet moderne të Shëngjinit prezantuan paketat e tyre, duke dëshmuar rritjen e standardeve të shërbimit vit pas viti. Kuzhina e njohur lezhjane, një miks perfekt mes prodhimeve të detit dhe kulinarisë tradicionale të zonës, ishte një nga pikat më të vizituara të mbrëmjes. Punimet artistike dhe artizanale të zonës morën vëmendje të veçantë, duke treguar se turizmi në Lezhë është i gërshetuar fort me trashëgiminë kulturore. Aktivitetet e shumta në det dhe lojërat e dedikuara për fëmijë krijuan një ambient ideal për familjarët.
Qershi mbi tortë ishte atmosfera që arriti kulmin me një koncert të madh artistik, i cili mblodhën bashkë performues të njohur dhe dhuroi emocione të papërsëritshme nën dritat e natës bregdetare.
Me këtë organizim dinjitoz, Bashkia e Lezhës jep mesazhin e qartë se Shëngjini dhe e gjithë zona e Lezhës janë plotësisht gati për të mirëpritur fluksin e turistëve për vitin 2026, duke ofruar siguri, mikpritje, standarde të larta dhe mbi të gjitha, një eksperiencë të paharrueshme.