Vendosja në arrest shtëpiak e drejtoreshës së SHISH, Vlora Hyseni, ka hapur një tjetër front politik në Shqipëri. Sipas analistit Kreshnik Spahiu, opozita po e përdor në mënyrë të gabuar këtë zhvillim, duke sulmuar pikërisht institucionin që i ka dhënë një prej dosjeve më të rëndësishme për të kërkuar përgjegjësi politike nga qeveria.
Spahiu argumentoi se SPAK dhe ish-kreu i tij, Altin Dumani, nuk duhet të jenë objektivi i opozitës në këtë situatë. Përkundrazi, ai tha se opozita duhet ta shfrytëzojë hetimin për të ngritur një debat më të gjerë mbi përgjegjësinë politike të qeverisë. “SPAK i ka dhënë opozitës një çështje me të cilën mund të kërkojë përgjegjësi politike nga qeveria”, tha Spahiu.
Ai riktheu në vëmendje edhe qëndrimet e mëparshme të opozitës ndaj SPAK-ut dhe Dumanit, duke argumentuar se sulmet e vazhdueshme ndaj tij krijojnë një kontradiktë me mënyrën se si opozita mund ta përdorë politikisht çështjen e SHISH. Sipas tij, në vend që të sulmojë Dumanin, opozita duhet të fokusohet te pyetja sesi është e mundur që një institucion i drejtësisë ka ndërmarrë një masë të tillë ndaj një zyrtareje të lartë të shtetit. “Është e rrallë të arrestosh një kryetar të SHISH në detyrë. Sot opozita duhet të na japë shpjegim si mundet që Altin Dumani e bëri këtë”, deklaroi ai.
Spahiu shkoi edhe më tej, duke thënë se qëndrimi i opozitës ndaj SPAK-ut po i krijon, sipas tij, hapësirë politike mazhorancës. “Ky njeri sulmon çdo ditë atë që duhej ta kishte aleat. Është e pafalshme që opozita i ka hequr mundësinë popullit për rotacion dhe godet këtë prokurori që ka hyrë në histori me këto dosje penale”, tha ai. Në përfundim, analisti bëri një apel të drejtpërdrejtë ndaj opozitës: “Duhet t’i kërkojnë falje publikisht Altin Dumanit”.