Pas më shumë se një dekade në shërbim të qytetit të Tiranës, Anuela Ristani ka njoftuar largimin e saj nga Bashkia e Tiranës, pas shkarkimit nga kryebashkiaku Veliaj. Në një mesazh të publikuar me rastin e largimit, Ristani shpreh mirënjohjen për vitet e punës në administratën e kryeqytetit dhe për qytetarët e Tiranës, duke e cilësuar përvojën e saj si të papërsëritshme.
“Pas më shumë se një dekade në shërbim të qytetit më të bukur në botë, largohem sot me krenari, përulësi dhe plot dashuri për Tiranën”, shkruan Ristani. Ajo i ka paraqitur ka paraqitur Erion Veliajt dorëheqjen si nënkryetare e Bashkisë.
Në mesazhin e saj, ajo ndalet edhe te e ardhmja e kryeqytetit, duke theksuar rëndësinë që Tirana të shihet dhe të dashurohet si qytet i përbashkët. Ristani thekson lidhjen e saj të përhershme me kryeqytetin, pavarësisht historisë së saj personale.
Postimi i plotë
Pas më shumë se një dekade në shërbim të qytetit më të bukur në botë, largohem sot me krenari, përulësi dhe plot dashuri për Tiranën. Atë që të gjithë e lakmojnë, shumë e duan, por pak e kuptojnë.
Qyteti për të cilin fillova të punoj 11 vite më parë, kur kaloja distancën e shkurtër por të gjatë të sheshit “Skënderbej“ që vetëm shesh nuk mund të quhej, është sot pikë takimi për vizitorë nga e gjithë bota, që nuk dinë t’i vënë tamam një emër joshjes që ndjejnë, pasi pika më e fortë e Tiranës është ndjesia e mirë që të jep.
Jam pa masë mirënjohëse për të gjithë bashkëudhëtarët e kësaj përvoje të papërsëritshme, dhe për qytetarët që thyen paragjykime shekullore dhe stereotipe brezash për t’u shfaqur të bukur dhe krenarë në të gjithë botën.
Koha është gjykatësi më i drejtë, më i paanshëm dhe më i pakapshëm. Në respekt të kohës, asaj që do të vijë, lipset që qytetin ta shohim pak më tonin e ta duam për atë që jemi, jo për atë që mund të na bëjë.
Dhe sa për mua, unë do të mbetem gjithmonë “xhomllikse” edhe pse kam lindur në Tiranë të Re dhe jam rritur përtej oqeanit. Largohem sot me mbështetjen dhe dashurinë e atyre që për mua kanë më shumë rëndësi. Faleminderit të gjithëve!