Nga Sokol Bregu – Nëse nuk do ta kisha parë nga kamerat e hotelit, ngjarjen e Pogradecit, çdo dëshmitari okular do ti thosha gënjeshtar. Shkaku është i thjeshtë. Në këtë vend njoh dhe kam takuar shumë personazhe të botës së krimit, por as ata më të përfolurit nuk do të hapnin zjarr mbi një hotel turistësh në këtë lloj forme. Edhe krimi ka një kufi, jo zjarr armësh të përqendruar mbi turistë, ku ka gra dhe fëmijë. Limitet janë limite. Ata që qëlluan nuk ja di emrat, por i njoh. Frikacakë të mbushur me viza kokaine që pendohen në mëngjes. Por nuk është çështja e tyre, as turpi i tyre. Në këtë rast turpi është i shtetit, i policisë dhe i çdo pjesëtari të shoqërisë. Komentet e medias në këtë rast shkojnë deri ne një krahasim me Palermon e 70-es, sepse ne jemi fajtorë që e kemi bindur opinionin publik, se cdo rast i ndodhur në shqipëri është mafioz.
Dhe kur ne vetë nuk kemi një përcaktim të qartë për ngjarjen, asnjë inspektor krimesh e aq më pak ministri I brendshëm nuk kanë formimin ligjor dhe perceptimin e duhur që kemi të bëjmë me një rast tipik terrorizmi. Sepse që ta quajmë të tillë sipas perceptimit policor, patjetër duhet të ketë besimtar feje. Policia e rregjistroi kanosje me armë zjarri, policia përtoi ti arrestonte ne kohë rekord. Rezultati…Një tjetër qëlloi në Ujin E Ftohtë në Vlorë, edhe ai arrestohet për kanosje. Një tjetër qëlloi në një resort. Në të gjitha rastet policia thotë se kanë precedentë penalë. Për fat asnjë i lënduar në këto raste, por askush nuk është i kanosur, të gjithë janë të terrorizuar. Ne themi mafiozë, por mafiozët e vrasin shënjestrën e tyre, ne themi mafiozë, por mafiozët qëllojnë mbi llojin e tyre. Kush përdor armë pa një shënjestër të qartë, është terrorist, dhe padyshim frikacak.
Mua më pëlqen shprehja e Kryeministrit, “kokat hëngshin”, edhe unë kështu them kokat hëngshin, por kush shet drogë, kryen vrasje, jo ata që pushojnë sidomos në këtë kohë të vështirë kovidi. Mihalin e arrestuam, e gjykuam, e shkaterruam, i morrem cdo gjë që kishte se sulmoi një spanjoll, “bravo” thamë të gjithë. Sot kur sulmohen turistë shqiptarë, nuk denojmë të çojmë as Renean të kthejmë sigurinë, u ngrejmë akuza të lehta dhe i quajme persona me preçedentë penalë. Të tillë në Shqipëri ka sa të duash, por le të urojmë që kokaina që përdorin të jetë e përzierë tre herë, se në të kundërt nuk po hanë kokat e tyre, do hanë kokat tona.
