Pandemia globale nuk e ka ndalur kompaninë ajrore Wizz Air,të shtojë 15 destinacione të reja fluturimesh me bazë në aeroportin e Rinasit.
Drejtori i Përgjithshëm i Wizz Air Group, József Váradi, tha se përveç tre avionëve me bazë në aeroportin “Nënë Tereza” kompania do të ofrojë çmime konkuruese.
“Hapja e bazës sonë dhe vendosja e tre avionëve modernë më të mëdhenj është një hap përpara për të forcuar praninë tonë afatgjatë në Shqipëri. Jemi të kënaqur që shtojmë pesëmbëdhjetë rrugë të reja tërheqëse sot dhe mbajmë standardet më të larta të protokolleve tona sanitare. Kemi besim se tarifat shumë të ulëta të Wizz Air dhe rrjeti i shkëlqyeshëm i rrugëve do ta bëjnë udhëtimin të përballueshëm për gjithnjë e më shumë pasagjerë”, tha Varadi.
Edhe drejtori i Përgjithshëm Ekzekutiv i Aeroportit Ndërkombëtar të Tiranës, Constantin von Alvensleben, vlerësoi nismën e Wizz Air e cila do të ketë një ndikim edhe në rritjen ekonomike.
Linjat e reja ajrore që fillojnë operimin në korrik të këtij viti do të zbatojnë masa të shtuara të higjienës sipas protokolleve anti-Covid.