Kjo e premte shënoi edhe mbylljen e fushatës elektorale për partitë që marrin pjesë në zgjedhjet e së dielës me kandidatët e tyre në 6 bashkitë e vendit. Kryetari i PD-së, Lulzim Basha ishte në Shkodër, ku bëri thirrje për një bashkim të madh, kjo sipas tij për të çarë rrethimin e të keqes.
Teksa i ftoi të gjithë të dalin masivisht në votime, Basha ftoi qytetarët që të bëhen bashkë për një parti Demokratike, duke votuar kandidatin e PD-së Xhemal Bushatin.
“Në këto zgjedhje, kujdestarit i kemi vënë fytyrën tuaj, fytyrën e qytetarit, e guximtarit, fytyrën e Xhamal Bushatit, birit shkodran dhe demokratit shkodran i cili edhe në këtë rrethim ku ndodhemi është bërë zëri juaj, shpresa juaj për të mos e lejuar Shkodrën të bjerë ne errësire, por për të qëndruar të gjithë bashkë. Ju ftoj që këtë energji që kemi mbledhur ta derdhni vrullshëm, të gjithë bashkë për të carë rrethimin e të keqes. Të gjithë masivisht të diele, për një PD, votoni numrin 3 dhe Xhemal Bushatin”.
