Kryeministri Edi Rama inspektoi sot akset e reja Orikum-Dukat dhe Palasë-Dhërmi, të cilat janë të hapura përkohësisht, për të lehtësuar qarkullimin e automjeteve, në këtë periudhë fluksesh të larta të lëvizjes së automjeteve. I shoqëruar nga zv/kryeministrja, njëherësh ministre e Infrastrukturës dhe Energjisë, Belinda Balluku, Rama pa nga afër këto kantiere që pritet të përfundojnë në qershorin e vitit 2024.
Rruga Orikum–Dukat, me gjatësi 14,75 kilometra, ku ende vijon puna është një prej investimeve më të rëndësishme infrastrukturore për qytetin e Vlorës dhe gjithë jugun e Shqipërisë, ndërtimi i së cilës do të bëjë të mundur lidhjen e bajpasit të Vlorës me portin e jahteve në Orikum dhe me tunelin e Llogorasë e bregdetin e jugut. “Në qershorin e 2024-ës kjo pjesë shumë e rëndësishme e gjerdanit të ri infrastrukturor të bregut jonian do të jetë e përfunduar”, tha Rama.
Balluku u shpreh se aksi Orikum-Dukat është një nga segmentet më të rëndësishëm, pasi lidh bajpasin e Vlorës me hyrjen e tunelit të Llogorasë. “Më pas lidhet me segmentin tjetër, të cilin e kemi hapur gjithashtu për kalimin e automjeteve që është segmenti Palasë-Dhërmi. Kjo është një kurorë e tërë infrastrukture e lidhur në çdo element me njëri-tjetrin duke nisur nga rruga e re e aeroportit të Vlorës, duke kaluar pastaj në bajpas, më pas në Orikum-Dukat, tunelin e Llogorasë dhe Palasë-Dhërmi. E gjitha kjo është një paketë që përfundon totalisht në qershorin e vitit 2024, për t’u dorëzuar për përdorim nga të gjithë automjetet dhe qytetarët”, tha Balluku.
Palasë–Dhërmi është një prej akseve të rëndësishme rrugore, vënia në funksion e të cilit lehtëson dhe shkurton kohën e udhëtimit turistik përgjatë bregdetit të jugut, duke lidhur daljen e tunelit të Llogorasë me Dhërmiun dhe duke ofruar një rrugë të re për të gjithë ata që duan të vizitojnë Dhërmiun. Ky projekt fillon në kryqëzimin e rrugës “Rrugët e bardha”, Palasë, pikë në të cilën është përcaktuar dhe lidhja me rrugën ardhëse nga dalja e tunelit të Llogorasë, vijon më tej nën fshatin Palasë, në një trase tërësisht të re, dhe përfundon në rrugën e kampit në Dhërmi.
Gjatësia e aksit është 4.45 km, ndërsa në projekt janë parashikuar dhe ndërtimi i disa rrugëve sekondare për aksesimin e zonave turistike të banuara. Balluku u shpreh se “Palasë–Dhërmi është një segment tashmë i përfunduar, i hapur për të gjitha automjetet”.
“Kemi akoma grupet e punës që merren me pjesën e bimësisë, me nivelime të ndryshme, pjesën e të gjitha veprave të artit që kemi ndërkohë. Duhet parë gjithashtu që kemi edhe një korsi në krahun e djathtë për këmbësorët e biçikletat”, tha ajo. Balluku theksoi se gjithë aksi është monitoruar javën e fundit, pasi ka vetëm një javë që është hapur, dhe trafiku nuk ka pasur në asnjë moment bllokim në këtë rrugë. “Ka qenë gjithë kohën një trafik i normalizuar. Edhe të shtunën dhe të dielën e kaluar që ka pasur një ngarkesë më të madhe megjithatë nuk ka pasur bllokime”, shtoi ajo.
