Drejtuesi politik i PD-së në qarkun Lezhë, Agron Gjekmarkaj pas numërimit të votave, ka falënderuar qytetarët që i besuan opozitës 4 mandate në këtë qark. Për të nuk ka qenë e lehtë që të ruhet mandati i katërt. Nga ana tjetër, Gjekmarkaj thekson se beteja e PD-së nuk ka mbaruar. ”Na vodhën, na kërcënuan, përdorën gjithçka që kishin, por nuk na thyen dot. Ne jemi një familje. Si familje luftuam dhe si familje dhe triumfuam në Qarkun e Lezhës dhe pse fitorja nëse nuk do vidhej, do ishte në të gjithë Shqipërinë”,-shkruan në një postim në Facebook.
Postimi i plotë
Të nderuar qytetarë të Lezhës, Mirditës dhe Kurbinit. Të dashur motra dhe vëllezër demokratë! Pas kaq ditësh të vështira, orësh të gjata tensioni dhe pas një beteje të padrejtë, Partia Demokratike arriti të ruajë mandatin e katërt, mandatin e fitores në Qarkun e Lezhës. Një fitore që s’është thjesht numër, por një triumf i qëndresës, i dinjitetit dhe i besimit tuaj që pushteti deri pak minuta më parë kërkoi ta nëpërkëmbë, ta grabisë.
Ju falënderoj me përulësi. Ju që nuk u dorëzuat përballë manipulimeve. Ju që rezistuat ndaj trysnisë, ndaj padrejtësisë, ndaj vjedhjes së votës dhe manipulimeve pa fund. Na vodhën, na kërcënuan, përdorën gjithçka që kishin, por nuk na thyen dot. Ne jemi një familje. Si familje luftuam dhe si familje dhe triumfuam në Qarkun e Lezhës dhe pse fitorja nëse nuk do vidhej, do ishte në të gjithë Shqipërinë.
Dua të falënderoj me gjithë shpirt kandidatët tanë të PD-ASHM në Lezhë,
Elda Hoti
Edison Doçi
Gjin Gjoni
Aleksandër Lala
Lindita Metaliaj
Kastriot Piroli
Viktor Tusha
Melisa Vuthaj
burra dhe zonja të nderuar që luftuan me zemër për këtë kauzë. PD është me fat që ju ka. Fitorja është meritë e përkushtimit tuaj të jashtëzakonshëm, vullnetit, qëndresës dhe përballjes.
Një falënderim të veçantë për çdo komisioner, numërues, vëzhgues, për çdo njeri që qëndroi zgjuar me net të tëra, vetëm që zëri qytetar të dëgjohej. Dhe mbi të gjitha, mirënjohje të thellë për strukturat tona të PD në Lezhë, Mirditë dhe Kurbin. Ju keni mbajtur gjallë frymën e fitores në këtë qark, edhe kur pushteti grabiti zgjedhjet kudo.
Sot nuk flasim vetëm një mandat më shumë në Lezhë. Sot kujtojmë se e vërteta, në fund, gjithmonë gjen rrugën e vet edhe përmes shumë padrejtësive të pushtetit antidemokratik. Beteja jonë nuk mbaron këtu! Faleminderit për besimin, për guximin dhe për qëndresën që i dhatë kësaj kauze dhe pse fitorja në rang kombëtar u plaçkit nga pushteti bandë.
Zoti ju bekoftë të gjithëve! Rroftë Lezha, Mirdita, Kurbini! Rroftë Partia Demokratike, rroftë lideri i saj Prof. Dr. Sali Berisha! Rroftë Shqipëria