Pas protestës së 8 janarit, nga oborri i selisë së PD-së, përplasja mes demokratëve sot u spostua edhe në Kuvendin e Shqipërisë. Në nisjen e sesionit të ri Parlamentar, në tryezën e deputetëve kishte mbërritur vendimi i kryesisë së PD-së për përjashtimin e katër deputetëve që janë pro Berishës, akt i cili solli përherë të parë në 30 vite debatin opozitë–opozitë brenda sallës së Kuvendit.
“Nuk kisha menduar kurrë që Lulzim Brava do të na sillte kohën e diktaturës duke përjashtuar njerëz nga partia, unë pres tani edhe fshatin ku do të na internojë”, tha Edmond Spaho.
Socialistët kërkuan qetësimin e gjakrave për të vijuar punimet e seancës. “Këtu në këtë sallë janë njoftuar vendime të grupeve parlamentare për përjashtime historikisht. Në këtë sallë janë përjashtuar Spartak Ngjela, Gilman Bakalli”, ndërhyri Taulant Balla.
Kjo ndërhyrje nga deputetët e përjashtuar nga grupi i PD-së u cilësua si mbështetje e PS-së për Bashën. Kryetari i ri i grupit parlamentar të PD, Enkeljed Alibeaj, mesazhin e dha në fjalën përshëndetëse të nisjes së sesionit. Konflikti i përjashtimeve nuk gjeti zgjidhje dhe seanca votoi vetëm Agron Gjekmarkajn si n/kryetari i ri i Kuvendit.