Kryeministri Edi Rama është kthyer në Athinë, pasi po merr pjesë në forumin e Delfit. Kreu i qeverisë është pjesë e një paneli ku flitet për politikën e jashtme. Rama tha se hapja e negociatave do ta ndihmojë Shqipërinë. Kreu i qeverisë nuk ngurron që të thotë se BE-ja e shtyu pa argumente bindëse procesin e anëtarësimit për Shqipërinë.
“Liderët e BE-së e kanë parë Ballkanin Perëndimor si një film në Netflix. Na lanë vetëm në një rrugë të gjatë, shtynë pa argumente bindëse procesin e negociatave të anëtarësimit. Ka një frymë të re në marrëdhënien tonë me BE. Hapja e negociatave do ta ndihmojë Shqipërinë. Jemi të detyruar ta shikojmë BE si të vetmen dritare për përmirësim”, u shpreh Rama.
Sa i përket Kosovës, kryeministri pohoi se ka qenë çmenduri nga ana e liderëve të BE-së mos liberalizimi i vizave. “E mbajtën peng për vite me radhë”, tha Rama. Për Serbinë përsërit se nuk është pro presionit për shtimin e sanksioneve. “Nuk jam pro presionit për shtimin e sanksioneve, serbët varen nga gazi rus”, tha ai. Në mbrëmje, Rama dhe të gjithë liderët që janë pjesëmarrës në forum janë ftuar në një darkë nga Kryeministri grek Kyriakos Mitsotakis.
