Nënkryetari i PD-së, Edi Paloka për marrëveshjen në Serbi: Ekonomia serbe përfiton, ekonomia shqiptare dëmtohet. Kosova izolohet ekonomikisht
Intervistoi: Redjon Shtylla
Pas nënshkrimit të deklaratës së përbashkët me Presidentin e Serbisë, Aleksandër Vuçiç dhe Kryeministrin e Maqedonisë së Veriut, Zoran Zaev, për Mini Shengenin në Ballkanin Perëndimor, Kryeministri i Shqipërisë, Edi Rama “goditi” Bashkimin Europian, kur tha se vendet e Ballkanit Perëndimor nuk kanë pse presin BE-në, duke iu referuar ngërçit për çeljen e negociatave të anëtarësimit. Në një bisedë me nënkryetarin e PD-së, Edi Paloka, i cili tha për “Koha Jonë”, se kemi të bëjmë vetëm me një marrëveshje Rama-Vuçiç, ku Zaev është futur sa për “maskim”. I pyetur se çfarë synon kjo marrëveshje, Paloka thotë se atë që nuk e bëri dot Tito me Enverin, po kërkon ta bëjë sot Rama me Vuçiç. “Shqipëria vihet nën influencën e Serbisë e cila merr dhe rol drejtues në këtë pjesë të Ballkanit. Kosova goditet direkt në të gjitha aspektet. Ekonomikisht, Serbisë i hapen hapësira që Millosheviçi nuk arriti t’i merrte me luftë, portet detare të shfrytëzueshme pa paguar asgjë. Ekonomia serbe përfiton, ekonomia shqiptare dëmtohet. Kosova izolohet ekonomikisht. Plan dhe marrëveshje më antishqiptare, nuk mund të imagjinonte e jo të realizonte një drejtues i shtetit shqiptar”.
Kryeministri Edi Rama, në Serbi pas takimit me Vuçiç dhe me Zaev, tha se vendet si Shqipëria dhe Maqedonia e Veriut nuk kanë pse presin BE-në, duke e sulmuar në një farë mënyre. Si e gjykoni këtë deklaratë?
Së pari që të flasësh për “Shengen Ballkanik” minimumi duhet të përfshihen të gjitha vendet e Ballkanit dhe që këtu i del boja mashtrimit, sepse një numër jo i vogël i vendeve ballkanike sot janë anëtare të BE-së. Kuptohet që kemi të bëjmë vetëm me një marrëveshje Rama-Vuçiç ku Zaev është futur sa për “maskim”. Futja e Zaevit në mes, ngjan me ato takimet e dy të dashurëve sekret që për të mos rënë në sy se janë në takim dashurie, marrin dhe një të njohur me vete. Ky është një akt që përmban disa elementë, për fat të keq të gjithë elementë negativ.
Si e shihni marrëveshjen e re mes Shqipërisë, Serbisë dhe Maqedonisë së Veriut, për “Schengen e Ballkanit Perëndimor”?
Së pari, ai element që është përpjekur ta vërë në dukje Vuçiç me gojën e tij duke deklaruar se “ka ardhur koha të shohim interesat e vendeve tona pa tutor mbi krye” gjë që e ka persëritur më pas edhe me gojën e Ramës që specifikon se “nuk presim me BE”. Në pamje të parë duket sikur kemi të bëjmë me një lloj “karshilliku” ndaj BE, gjë që Rama e ka bërë dhe më herët me deklarata të tipit; “po nuk na pranuat shkojmë tek të tretët” dhe kush janë “të tretët” pas Serbisë, dihet. Në fakt akti është edhe më i rëndë se kaq dhe nuk vjen rastësisht menjëherë pas zgjedhjeve në Kosovë dhe pas diskretitimit të marrëveshjes tjetër për ndarjen e Kosovës. Vuçiç si gjithnjë, duke shfrytëzuar nga një anë sjelljen prej vasali dhe në anën tjetër deliret e Ramës, është kujdesur që idetë e tij dhe atyre që janë pas tij, t’i shfaqë me gojën e shërbëtorëve shqipfolës.
Nga ana tjetër, çfarë synon praktikisht kjo marrëdhënie e re Rama-Vuçiç?
Marrëveshja Rama-Vuçiç për të ashtuquajturin “Shengen Ballkanik” nuk është gjë tjetër vetëm idea e vjetër e “Jugosllavisë” që do përfshinte dhe Shqipërinë e ringjallur nga Vuçiç si idea e “Jugosllavisë se re” dhe e mbështetur nga Rama si gjoja “Shengen Ballkanik”. Ata që e njohin historinë, e dijnë se Tito për pak arriti ta realizonte gllabërimin e Shqipërisë brenda Jugosllavisë, sigurisht me mbështetjen e plotë të Enver Hoxhës, babait dhe mentorit të Edvinit. Vetë diktatori do ta denonconte “hilen” e Titos pasi marrëveshja mes tyre u prish për shkak të interesave të tjera brenda kampit socialist (përplasjet Stalin-Tito). Po dhe për aq kohë sa funksionoi “bashkimi ekonomik”, siç deklaronte vetë Hoxha, rrënoi plotësisht ekonominë shqiptare që boll e rënuar ishte dhe pa atë marrëveshje. Atë që nuk e bëri dot Tito me Enverin, po kërkon ta bëj sot Rama me Vuçiç. Politikisht, e shkëpusin Shqipërinë nga partnerët dhe aleatët tanë natyral. Shqipëria vihet nën influencën e Serbisë e cila merr dhe rol drejtues në këtë pjesë të Ballkanit. Kosova goditet direkt në të gjitha aspektet. Ekonomikisht, Serbisë i hapen hapësira që Millosheviçi nuk arriti ti merrte me luftë, portet detare të shfrytëzueshme pa paguar asgjë. Ekonomia serbe përfiton, ekonomia shqiptare dëmtohet. Kosova izolohet ekonomikisht. Plan dhe marrëveshje më antishqiptare, nuk mund të imagjinonte e jo të realizonte një drejtues i shtetit shqiptar.