Një intervistë e kryeministrit Edi Rama për “Financial Times” mbi situatën në veri të Kosovës, ka shkaktuar një lajm të çuditshëm. Pas publikimit, vetë gazetari flet për një lapsus në citimin që redaksia i ka bërë një fjalie të Ramës.
Teksa fillimisht citohej se sipas Ramës, “Kosova është një pikë e nxehtë dhe me kalimin e viteve është bërë një tokë e askujt ku kombinohen të gjitha llojet e krimeve”, gazetari sqaron më pas se kryeministri Edi Rama i referohet veriut dhe jo shtetit të Kosovës.
“E kemi ndryshuar këtë artikull për të sqaruar se kryeministri shqiptar po diskutonte problemet në veri të Kosovës, jo në të gjithë vendin”, shkruan gazetari i FT, Marton Dunai në rrjetin social X.
