Benet Beci, kryetari i ardhshëm i Bashkisë Shkodër dhe bashkëshortja e tij, Fitore Beci janë parë në rrugët e qytetit duke ecur me biçikleta. Familja Beci është rikthyer në vendlindje.
Qytetarët shkodranë e kanë përshëndetur këtë veprim të kryebashkiakut të ri dhe bashkëshortes së tij, të cilët i janë bashkuar menjëherë traditës me dyrrotakët e tyre.
“Siç thotë shprehja: When in Rome, do as the Romans do (d.m.th kur je në Shkodër, bëj siç bëjnë shkodranët). Popullit nuk i ka shpëtuar kjo shëtitje me biçikletë dhe u kënaqa kur ma sollën. Por ajo që dua të nënvizoj në fakt në këtë status është dashuria dhe respekti me të cilin na përshëndesin njerëzit. Një atmosferë super pozitive dhe mikpritëse që Tiranës i mungon. Ndihem vërtet e privilegjuar”, shkruan Fitore Beci dhe ndan videon e dërguar nga shkodranët.
Ndërkohë paradite Benet Beci ka zhvilluar një takim në Shirokë. Pas takimit kryebashkiaku shkodran shkruan në facebook: “Në Shirokë, me banorë e përfaqësues të bizneseve aty. Mbeturinat, trafiku, parkimet, banjot publike, monitorimi e riparimet në këtë zonë janë çështjet e diskutuara.
Në pritje të zyrtarizimit si kryetar bashkie, kam bërë dy ndërhyrje konkrete.
I kam kërkuar drejtuesit të Policisë së Shtetit dhe kam marrë garancinë e tij që patrulla e policisë do të jetë e pranishme me kohë të plotë për mbarëvajtjen e trafikut dhe parkimeve në zonë.
U kam kërkuar bizneseve në zonë dhe kompanisë përgjegjëse për pastrimin e saj që nxjerrja, grumbullimi dhe heqja e mbeturinave të bëhen në një orar të caktuar çdo natë, duke shmangur qëndrimin e tyre gjatë ditës në kosha, aq më shumë nën temperaturat e stinës.
Dua t’ju siguroj që do të bëj maksimumin që ky sezon turistik të menaxhohet sa më mirë, në dobi të qytetarëve shkodranë, bizneseve në zonë e turistëve që shpresojmë të jenë të shumtë”- përfundon Beci.
