Një ditë pasi ndërmori aktin ekstrem duke u hedhur nga kati i tretë i spitalit Infektiv, ka ndërruar jetë pacienti 69-vjeçar me COVID-19. Lajmi bëhet i ditur nga burime pranë QSUT-së.
Këto burime bëjnë me dijen se shtetasi me inicialet R.G., ka ndërruar jetë mëngjesin e sotëm, pavarësisht përpjekjeve të mjekëve.
Lajmi që tronditi opinionin publik ndodhi mesditën e djeshme.
I shtruar vetëm një ditë më parë në spital, 69-vjeçari Reshat Grembi nga Fieri ndërmori aktin ekstrem të vetëvrasjes, duke u hedhur nga ballkoni i spitalit.
Vajza e tij, Esmeralda Kane, tha gjatë një interviste se babai i saj kishte vetem temperaturë. Ajo tregon se pasi e sollen në Tiranë e kanë lënë në korriduar dhe pa mjekime.
“Baba im nuk ka pasur asnjë simptomë përpara, por vetëm thjesht tri ditë me temperaturë, e sollëm nga Fieri deri këtu. Ka ndenjur në korridor nga 08:30-15:30 pasdite dhe pa mjekim” tha vajza.
Ndërsa kushëriri i tij, u shpreh per gazetarët se vetëm ditën e djeshme e ka marrë vesh që ai ka qenë i infektuar me koronavirus.
“Nuk e dimë çfarë i bëjnë atje doktorët, çfarë medikamenti ju japin, se ai kështu ishte në rregull”, thotë Grëmbi, ndërsa tregon se Grëmbi nuk ka pasur asnjë problem shëndetësor të mëparshëm.