Turistët e huaj por edhe ata vendas kanë pasur një risi sa i takon pushimeve në vendin tonë. Për t’u ardhur në ndihmë të gjithë pushuesve, Ministria e Turizmit lancoi aplikacionin TEA, në të cilin pasqyrohen evente të ndryshme kulturore, sportive apo historike në të gjithë vendin.
Sa i takon këtij aplikacioni, kryeministri Edi Rama thotë se është kthyer në një guidë për të mijëra vizitorët e Shqipërisë, të cilët e përdorin TEA-n për t’u informuar lidhur me aktivitetet që do mbahen.
“MIRËMËNGJESI dhe me udhëtimin e TEA që vazhdon, pasi kapërcyem kufijtë dhe e kthyem në një guidë frymëzuese për mijëra turistë, që e bënë këtë aplikacion pjesë të pushimeve dhe eksperiencës së tyre unike në Shqipëri, ju uroj një të diel të qetë”, shkruan Rama.
Në aplikacionin TEA (Kalendarit Turistik të Shqipërisë) pasqyrohen eventet e kategorive të ndryshme si Art Fest, Trashëgimi Kulturore, Festivale Muzikore, Sport, Koncerte, Folklor, Festa Lokale, Arte Pamore, Agroturizëm e Kulinari dhe Teatër. Janë mbledhur në çdo cep të Shqipërisë mbi 1.110 evente nga më të ndryshmet dhe TEA sjell informacionin për çdo event, për çdo preference e grupmoshë, në shqip e në anglisht.
Çdo event brenda aplikacionit do të ketë faqen e tij të dedikuar me informacion të detajuar dhe përdoruesit do të njoftohen për eventet e tyre të preferuara kur data e tyre të afrojë. Tourism Events of Albania është aplikacioni i parë i krijuar në Shqipëri, si kalendari i parë digjital për eventet e turizmit kulturor, sporteve dhe të traditës, i disponueshëm në Apple Store dhe në Play Store.