Ish-ministrja e policisë maqedonase, Gordana Jankullovska vazhdon t’i quajë terroristë pjesëtarët e grupit të Kumanovës të cilëve ende gjykata penale e Shkupit nuk u ka shqiptuar asnjë dënim shkruan Zhurnal Maqedoni.
Me këtë Jankullovska përmes një postimi në Facebook mer rolin e gjykatës ndaj grupit të shqiptarëve të cilët kryesisht janë nga Kosova. Ajo madje rastin e Lagjesë së Trimave tenton që ta krahasoj me sulmet terroriste që ndodhën dje në aerportin dhe metron e Brukselit ku humbën jetën së paku 34 persona të pafajshëm.
“Në Bruksel ka sulm terrorist. Në Shkup ka gjykim për terroristët të cilët vranë 8 policë në Lagjen e Trimave.Nuk ka përgjigje tjetër kundër terrorizmit, përvec se duhet reagimi i ashpër dhe i vendosur”, shkruan mes tjerash Jankullovska në Facebook.
Ndryshe para një viti më 9-10 maj në lagjen e Trimave në Kumanovë u përleshën forcat speciale maqedonase me grupin e Kumanovës ku bilanci ishte 10 shqiptar të vrarë dhe 8 policë humbën jetën nga forcat elite maqedonase.
29 antarët e grupit të Kumanovë ende janë në paraburgim në Maqedoni dhe shumica janë nga Kosova. Ndaj tyre vazhdon séanca gjyqësore, ndërsa gjykimi do të bëhet pas disa muajsh.