Zyrtarët e Turqisë thonë se trupat e pajetë të së paku 21 migrantëve janë gjetur sot në dy lokacione në bregdetin e Egjeut, pasi anijet e tyre ishin fundosur gjatë përpjekjes për të arritur në ishullin grek, Lesbos.
Zyrtarët e Turqisë thanë sot se trupat janë gjetur në bregdetin Ajvalik dhe Dikili.
Raportohet se ndër të vdekurit ka gra dhe fëmijë.
Agjencia e lajmeve Dogan ka njoftuar se në të dy incidentet tragjike, migrantët e kishin humbur jetën, pasi anijet e tyre të gomës ishin përmbysur në ujërat e rrëmbyeshëm të detit.
Rojet bregdetare të Turqisë gjatë kërkimeve i kishin shpëtuar tetë migrantë.
Gjatë vitit 2015, afro 850 mijë migrantë kanë kaluar nga Turqia në Greqi.