Kënga më e popullarizuar në shqiptari, “Mora fjalë” është hequr nga të gjitha platformat në internet, pas një kontesti për të drejtat e autorit. Bëhet fjalë për versionin origjinal të saj, që këndohej nga Shkurte Fejza, por që është shkruar dhe kompozuar nga Naim Gjoshi. Është ai që përmes zyrës ligjore “NewWay Consulting”, konfirmoi për KosovaPress se ishte vetë ai i cili e bëri kërkesën ta largojë këngën nga çdo kanal zyrtar.
“Në cilësinë e përfaqësuesit ekskluziv të autorit z. Naim Gjoshi për përfaqësimin dhe mbrojtjen ekskluzive të të drejtave të tij mbi tekstet dhe kompozimet, duam të qartësojmë përdoruesit: Çdo vepër e tij që është publikuar apo shpërndarë pa leje në YouTube, Facebook, Instagram, TikTok apo në çdo platformë tjetër, online, të cilat kanë vendosur veprën në dispozicion të publikut kudo në botë, do të trajtohen si përdorim i paautorizuar”, tha “NewWay Consulting”.
Në një deklaratë me shkrim zyra ligjore njoftoi se nëse të tjerët duan ta përdorin këngën, ata duhet të marrin leje përkatëse për të drejtën e autorit nga Gjoshi. “Ata që duan të vazhdojnë ta përdorin veprën duhet të marrin lejen përkatëse të autorit dhe të adresojnë edhe përdorimin e bërë deri tani pranë zyrës ligjore. Fakti që një këngë gjendet në internet nuk do të thotë se është pa pronar apo e lirë për t’u përdorur. Këto veprime të ndërmarra nuk kanë për qëllim denigrimin e performuesve, por vënien në vend të reputacionit dhe respektimin e veprës (pronës) së autorit z. Naim Gjoshi. Veprat kanë autor. Të drejtat kanë zotërues. Dhe ato duhet të respektohen”, përfunduan NewWay Consulting.
KosovaPress ka kontaktuar dhe me këngëtaren Shkurte Fejza, e cila e ka bërë të njohur këtë këngë, por nuk ka marr ndonjë përgjigje. Ndërsa është duke provuar ta kontaktojë edhe Qazim Bekën, këngëtarin që i pari e këndoi atë që do të shndërrohej në këngën më frymëzuese në shqiptari, fillimisht me titullin “Çohu Adem”. /KosovaPress/