Një nga emisionet më jetëgjata të ekranit shqiptar hyn në një fazë të re. “Fiks Fare” rikthehet me një dyshe të re në moderim, duke vendosur përballë publikut dy figura me profile dhe energji të ndryshme: Olta Gixhari dhe Dorian Ramaliu.
Për Olta Gixharin e cila për dy sezone ka qenë në rolin e opinionistes në ”Big Brother Kosova Vip”, kjo është një sfidë e re në karrierën televizive.
Ndryshimi shënon një kapitull të ri për formatin investigativ, i cili prej vitesh është identifikuar me denoncimet e qytetarëve, problematikat sociale dhe përballjen me institucionet.
Gixhari dhe Ramaliu do të kenë tashmë detyrën për të sjellë në ekran historitë, denoncimet dhe shqetësimet që kanë qenë në qendër të “Fiks Fare”, por me një qasje të re dhe një ritëm tjetër televiziv.
Mbetet për t’u parë se si do të funksionojë kjo dyshe dhe çfarë ndryshimesh do të sjellë sezoni i ri. Një gjë, megjithatë, nuk ndryshon: “Fiks Fare” vazhdon të kërkojë përgjigje aty ku qytetarët presin prej kohësh t’i marrin.
