Vizita e Jorge Mendes në selinë e Milanit ka sjellë zhvillime të rëndësishme jo vetëm për zyrtarizimin e Diego Moreiras, por edhe për të ardhmen e Rafael Leao. Sipas raportimeve nga Italia, drejtuesit kuqezi kanë konfirmuar vendimin për t’i dhënë fund bashkëpunimit me sulmuesin portugez.
Gerry Cardinale, i cili mori pjesë në diskutimet përmes një lidhjeje online, ka konfirmuar vullnetin e klubit për t’u ndarë nga Leao, në një vendim që thuhet se është dakordësuar edhe me trajnerin Ruben Amorim.
Situata e portugezit duket tashmë e qartë: Leao nuk konsiderohet më pjesë e projektit të Milanit dhe ditët e fundit të merkatos mund të jenë vendimtare për të ardhmen e tij. Madje, nuk përjashtohet mundësia që sulmuesi të mos grumbullohet për ndeshjen ndaj Torinos, një tjetër sinjal se marrëdhënia mes tij dhe klubit po shkon drejt fundit.
Megjithatë, Milani nuk ka ndërmend ta shesë Leao me çdo kusht. Pas një takimi prej rreth gjashtë orësh, drejtuesit kanë përcaktuar edhe vlerën e kartonit të tij. Kërkesa fillestare prej 60 milionë eurosh është ulur, por klubi vazhdon të kërkojë 50 milionë euro për të lejuar largimin e sulmuesit.
Vëmendja e Milanit është përqendruar veçanërisht te Turqia, ku pritet një ofertë e re nga Galatasaray. Klubi turk deri tani ka ofruar 40 milionë euro plus bonuse, por kuqezinjtë synojnë një propozim që të afrohet me shifrën e 50 milionë eurove.