Abissnet Superiore e ka nisur edicionin e 88-të me një përballje plot emocione. Në “Loro Boriçi”, Vllaznia dhe Skënderbeu barazuan 2-2, në një ndeshje ku vendasit patën avantazhin e dyfishtë, por nuk arritën ta ruanin deri në fund.
Pas një pjese të parë pa gola, ritmi i sfidës ndryshoi menjëherë pas pushimit. Vllaznia goditi dy herë brenda pak minutash, me Bekim Balajn që u kthye në protagonist kryesor. Sulmuesi shkodran realizoi në minutën e 50-të dhe vetëm katër minuta më vonë shënoi sërish, duke e çuar rezultatin në 2-0.
Skënderbeu nuk u dorëzua dhe reagoi shpejt. Në minutën e 57-të, Janaqi realizoi një gol spektakolar me një goditje nga distanca, duke ngushtuar diferencën dhe rikthyer shpresat e korçarëve.
Skuadra e drejtuar nga Julian Ahmataj vijoi të kërkonte golin e barazimit dhe përpjekjet e saj u shpërblyen në minutën e 75-të. Bismark përfitoi nga aksioni ofensiv i Skënderbeut dhe dërgoi topin në rrjetë, duke vendosur shifrat në 2-2.
Në fund, Vllaznia u detyrua të luante me 10 futbollistë, pasi Duliç u ndëshkua me kartonin e dytë të verdhë në minutën e 88-të. Skënderbeu pati mundësinë të përfitonte nga epërsia numerike, por nuk arriti të gjente golin e fitores.