Gazetari sportiv Ermal Toti ka shprehur kritika të forta ndaj FIFA-s për përzgjedhjen e arbitrave në fazën finale të Kupës së Botës, duke vënë në pikëpyetje gjyqtarin Ivan Barton nga El Salvadori.
I ftuar në emisionin “Koha e Botërorit”, Toti u shpreh se ndeshje të kalibrit si gjysmëfinalet duhet të drejtohen vetëm nga arbitra që gjykojnë rregullisht në kampionatet më të forta evropiane.
“Po shkojmë nga arbitra të Kazakistanit, Uzbekistani apo El Salvadori. Mund të jenë arbitra të mirë, por nuk kanë nivelin dhe eksperiencën për të drejtuar një Francë-Spanjë apo ndeshje të këtij kalibri. Një arbitër që nuk gjykon çdo javë në Serie A, Premier League, La Liga, Bundesliga apo kampionatin francez, e ka shumë më të vështirë të përballojë presionin e një gjysmëfinaleje Botërori”, deklaroi Toti.
Sipas tij, FIFA merr një rrezik të madh kur ua beson ndeshje kaq të rëndësishme arbitrave që nuk kanë eksperiencë në nivelet më të larta të futbollit.
“Futboll luhet kudo në botë dhe kjo nuk vihet në diskutim. Por kur vendos përballë Francën dhe Spanjën një arbitër kaq modest, duhet të jesh i përgatitur për çdo skenar. Nëse një vendim i gabuar ndikon rezultatin, më pas nuk ka më kthim pas. Mund të kërkosh falje sa të duash, por ndeshja është homologuar dhe skuadra e eliminuar nuk e rikthen më atë mundësi”, theksoi ai.
Toti e konsideroi përzgjedhjen e arbitrave një nga elementët më delikatë të organizimit të një Botërori, duke shtuar se FIFA duhet të garantojë standardin më të lartë të mundshëm në ndeshjet vendimtare të turneut.
Emisioni i plotë: