Kombëtarja gjermane ka kaluar një periudhë të vështirë vitet e fundit, me ndryshime të shpeshta në pankinë dhe rezultate që kanë mbetur larg pritshmërive. Hansi Flick, Julian Nagelsmann dhe tashmë Jürgen Klopp janë emrat që kanë drejtuar skuadrën në harkun e rreth pesë viteve, por sipas legjendës gjermane Michael Ballack, problemet nuk mund t’u atribuohen vetëm trajnerëve.
Ish-kapiteni i Gjermanisë, tashmë në rolin e analistit te Sky Deutschland, thekson se edhe futbollistët duhet të marrin përgjegjësi dhe të tregojnë më shumë karakter në momentet e vështira.
“Kam përshtypjen se kemi shumë pak liderë që janë të gatshëm t’i thonë gjërat hapur njëri-tjetrit në dhomat e zhveshjes. Flas për autokritikë dhe aftësinë për të korrigjuar veten. Ky proces duhet të nisë nga vetë skuadra”, deklaroi Ballack.
Sipas tij, trajneri mund të ketë ndikim të madh, por nuk mund të jetë përgjegjës për gjithçka. “Flasim gjithmonë shumë për trajnerin. Sigurisht, ai mund të ketë një ndikim të konsiderueshëm, veçanërisht në aspektin negativ. Por hapi i fundit i progresit duhet të vijë nga vetë skuadra. Lojtarët duhet të dinë të marrin vendime në fushë dhe të menaxhojnë vetë situatat”, shtoi ai.
Ballack ngriti gjithashtu pikëpyetje mbi mënyrën se si po zhvillohet futbolli gjerman. Sipas tij, futbolli në Gjermani mund të jetë bërë tepër taktik dhe i standardizuar, një problem që nis që në moshat e reja. Kjo, sipas ish-mesfushorit, rrezikon t’i privojë futbollistët nga aftësia për të menduar dhe marrë vendime në mënyrë të pavarur gjatë ndeshjeve.