Bernardo Silva pritet të largohet nga Manchester City në fund të sezonit, duke i dhënë fund një epoke të suksesshme me kampionët anglezë. Mesfushori portugez 31-vjeçar po zhvillon sezonin e tij të nëntë dhe të fundit me klubin, ku ka luajtur 449 ndeshje, ka shënuar 42 gola dhe ka dhënë 34 asiste. Nën drejtimin e Pep Guardiolës, Silva ka qenë një figurë kyçe, por tani ka bërë edhe më të qarta arsyet e largimit të tij në një intervistë për mediat e klubit, megjithëse largimi i tij zyrtar ende nuk është komunikuar.
Silva theksoi dallimet e mëdha kulturore mes Portugalisë dhe Anglisë si faktorin kryesor. “Kulturisht, portugezët dhe anglezët janë mjaft të ndryshëm; klima, ushqimi, mënyra e jetesës janë paksa ndryshe,” shpjegoi ai. Ai shtoi me shaka se nëse Mançesteri do të ishte më në jug të Evropës, ai do të qëndronte atje “derisa të më nxirrnin me shkelma”, duke theksuar dashurinë e tij të thellë për klubin, shokët e skuadrës, stafin, tifozët, stadiumin dhe atmosferën – gjithçka që lidhet me jetën e tij profesionale.
Megjithatë, aspekti tjetër i jetës së tij, ai personal, nuk i ka përmbushur pritshmëritë. “Nuk them që nuk më pëlqen, por kulturalisht nuk është pikërisht ajo që do të doja idealisht,” tha Silva. Kjo ka bërë që në disa momente të mos ndihej aq i lumtur sa do të dëshironte. Ai zbuloi se para se të takonte gruan e tij, kishte kaluar një periudhë i vetëm në Mançester ku nuk ndihej mirë me veten, duke menduar seriozisht për t’u larguar. Kjo dëshirë për largim nuk vinte nga mungesa e dashurisë për klubin, të cilin e adhuron, por nga pakënaqësia me aspektin kulturor të jetës së tij.
Pavarësisht këtyre mendimeve, Silva shprehu gëzimin e tij që nuk u largua atëherë. “Jam shumë i lumtur që nuk ndodhi!” tha ai, duke theksuar se ndoshta do të kishte humbur mundësinë për të përjetuar kujtimet e tripletës historike, katër titujve radhazi, mundësinë për të qenë kapiten, për të qenë pjesë e grupit drejtues, për të transmetuar përvojën e tij te të rinjtë dhe për të ndihmuar klubin të arrinte vendin që meriton. Ai përsëriti se nëse Manchester City do të ishte në Lisbonë, ai do të qëndronte deri në moshën 40-vjeçare.
Mbështetja e tifozëve luajti një rol thelbësor në qëndrimin e tij. Silva kujtoi se në fillimet e karrierës së tij, kur kishte menduar të largohej dhe lajmet qarkullonin në shtyp, reagimi i tifozëve ishte gjithmonë “i pabesueshëm, në një mënyrë befasuese”. Ai vuri në dukje se në vende të tjera, ndoshta do të ishte fishkëllyer, por tifozët e City-t e respektuan gjithmonë si lojtar dhe si person, e pritën me krahë hapur dhe e ndihmuan, duke e konsideruar këtë si një nga arsyet kryesore pse qëndroi kaq gjatë.
Lidhur me të ardhmen e klubit, Silva shprehu besimin e tij te brezi i ri i lojtarëve. “Shoh të njëjtën ambicie për të pasur sukses te të rinjtë,” tha ai. Ai beson se lojtarët e rinj tani i njohin standardet e klubit dhe nivelin e kërkuar, të cilin ata e kanë vendosur gjatë tetë apo nëntë viteve të fundit. Kjo u jep atyre edhe më shumë dëshirë për të dhënë maksimumin dhe për të treguar se edhe ata janë të aftë të arrijnë suksesin. Ambicia e klubit mbetet e lartë, me Silva-n që thekson se City ka treguar se kushdo që dëshiron të jetë pjesë e tij, duhet të jetë një fitues. Lojtarët e rinj që janë bashkuar në dy-tre vitet e fundit janë shumë të mirë dhe mund ta çojnë klubin aty ku ishte: një vend ku mund të luftohet për tituj çdo sezon.
Marrë nga Marca Premier