Në prag të duelit të parë për fazën e dytë ndaj Lecces, trajneri Antonio Conte ka dalë në konferencën e zakonshme për shtyp, duke u shprehur optimist për një rezultat pozitiv. Strategu italian e cilësoi si një futbollist ekspert mbrojtësin Young, i cili është afrimi i fundit në merkato.
“Jam gjithmonë i lumtur dhe i emocionuar kur rikthehem në Lecce. Skuadra po bën një paraqitje të mirë, por duhet të djersijë shumë në gjysmën e dytë të sezonit për të siguruar mbijetesën. Ne duam të rikthehemi te fitorja dhe jemi përgatitur për ta bërë këtë, ndonëse nuk do të jetë aspak e lehtë të përsëriten rezultatet e fazës së parë.
Merkato? Young është një futbollist ekspert, që mbulon disa pozicione në fushë dhe do të na bëjë të ndihemi më të qetë në rast dëmtimesh. Erdhi vetëm dje dhe nuk do të jetë në Lecce, por do ta kemi gati që nga ndeshja ndaj Cagliarit. Për shkëmbimin Politano-Spinnazzola dhashë miratimin tim, por nuk e di çfarë ndodhi më pas. Sa i përket Eriksen, duhet të pyesni drejtuesit për më shumë detaje”, u shpreh Conte.
