Përfaqësueset afrikane hynë në Kupën e Botës 2026 me pritshmëri të larta, të ushqyera nga rritja e futbollit në kontinent gjatë viteve të fundit. Megjithatë, faza me eliminim direkt ka rezultuar zhgënjyese për shumicën prej tyre, pasi katër kombëtare u eliminuan duke pësuar gola vendimtarë në minutat e fundit të ndeshjeve.
Gazeta nga Burkina Faso, *Aujourd’hui*, e cilësoi këtë fenomen si “sindroma e minutës së fundit”, duke theksuar se futbolli afrikan duhet të reflektojë mbi aspektin psikologjik dhe aftësinë për të menaxhuar momentet vendimtare të ndeshjeve.
Në total, nëntë nga dhjetë kombëtaret afrikane arritën të kalonin fazën e grupeve, një rekord i rëndësishëm për kontinentin. Megjithatë, nga pesë skuadrat që kanë luajtur deri tani në 1/16-at e finales, vetëm Maroku ka siguruar kualifikimin në raundin tjetër, pasi eliminoi Holandën pas goditjeve të penalltive.
Senegali përjetoi një nga eliminimet më dramatike të turneut. “Luanët e Terangës” kryesonin 2-0 deri në minutën e 86-të ndaj Belgjikës, por pësuan dy gola brenda pak minutash, ndërsa në kohën shtesë Youri Tielemans realizoi golin e fitores në minutën e 125-të. Mediat senegaleze kritikuan ashpër trajnerin Pape Thiaw për zëvendësimet, ndërsa mesfushori Pape Gueye deklaroi se do të marrë një pauzë nga kombëtarja derisa të ketë ndryshime në stafin teknik.
Edhe Republika Demokratike e Kongos u eliminua në mënyrë të dhimbshme. Afrikanët kaluan në avantazh që në minutën e shtatë ndaj Anglisë dhe rezistuan deri në minutën e 75-të, kur Harry Kane barazoi rezultatin. Goli i fitores për anglezët erdhi në minutën e 86-të. Megjithatë, mediat kongoleze e konsideruan paraqitjen e ekipit si një sukses, duke vlerësuar faktin që skuadra sfidoi një nga favoritët e turneut.
Një fund i ngjashëm pati edhe Bregu i Fildishtë. Pasi barazoi 1-1 ndaj Norvegjisë me golin e Diallos, skuadra afrikane u ndëshkua në minutën e 86-të nga Erling Haaland. Mediat vendase vlerësuan karakterin e ekipit, por kritikuan mungesën e përvojës në menaxhimin e minutave vendimtare.
Serinë e eliminimeve dramatike e hapi Afrika e Jugut, e cila u mposht nga Kanadaja me golin e Stephen Eustáquio në minutën e 92-të. Mediat e vendit e përshkruan eliminimin si “mënyrën më të dhimbshme të mundshme”.
Ndërsa Algjeria, Egjipti dhe Gana ende nuk kanë zhvilluar ndeshjet e tyre në fazën me eliminim direkt, Maroku mbetet deri tani shpresa e vetme e kontinentit afrikan për të vazhduar rrugëtimin në Kupën e Botës 2026.