Drita ka shkruar historinë në futbollin kosovar, duke siguruar për herë të parë kualifikimin në fazën e grupeve të UEFA Conference League. Pas fitores 2-1 në ndeshjen e parë në Prishtinë ndaj Differdange, skuadra e trajnerit Zekerija Ramadani tregoi edhe një herë forcën e saj, duke triumfuar edhe në Luksemburg.
Ndeshja nisi mbarë për kampionët e Kosovës, pasi vendasit mbetën me një lojtar më pak që në minutën e 3’, pas një kartoni të kuq. Epërsia numerike u shfrytëzua në pjesën e dytë, kur në minutën e 62’ Besnik Krasniqi shënoi me penallti, duke vulosur rezultatin dhe kualifikimin e skuadrës gjilanas.
Në minutat e fundit, ekipi menaxhoi me kujdes avantazhin, duke siguruar një sukses historik me rezultatin e përgjithshëm 3-1.
Drita do të mësojë të premten, më 29 gusht, emrat e gjashtë kundërshtarëve me të cilët do të përballet në fazën e grupeve të Conference League, duke nisur kështu një kapitull të ri për futbollin kosovar në arenën europiane.