Finalja e Kupës së Botës 2026 mund të sjellë një risi të madhe për tifozët, pasi pushimi mes dy pjesëve pritet të zgjasë nga 20 deri në 25 minuta për t’i hapur rrugë një spektakli madhështor në stilin e Super Bowl-it.
Sipas raportimeve të BBC, FIFA po shqyrton mundësinë që, përveç 15 minutave tradicionale të pushimit, të shtohen edhe rreth 10-11 minuta të tjera për zhvillimin e “half-time show”. Në këtë spektakël pritet të performojnë emra të njohur të muzikës botërore, mes tyre Madonna, Shakira dhe Justin Bieber.
Një format i ngjashëm u aplikua edhe vitin e kaluar gjatë finales së Kupës së Botës për Klube, ku spektakli i pushimit zgjati plot 24 minuta.
Ndërkohë, përpara nisjes së finales do të zhvillohet ceremonia zyrtare e mbylljes së Kupës së Botës. Një nga emrat kryesorë që do të ngjitet në skenë gjatë ceremonisë do të jetë këngëtarja italiane Laura Pausini, e cila do të jetë një nga protagonistet e eventit.
Nëse konfirmohet, kjo do të jetë hera e parë që një finale e Kupës së Botës do të ketë një spektakël të përmasave të ngjashme me atë të Super Bowl-it, duke e kthyer ndeshjen më të rëndësishme të futbollit botëror në një ngjarje edhe më madhështore.