Gavi ka treguar edhe një herë anën e tij humanitare, duke vendosur të investojë 1.3 milionë euro në një projekt social në vendlindjen e tij, Los Palacios y Villafranca, në Spanjë.
Sipas raportimeve të “La Razón”, fondet e dhëna nga mesfushori i Barcelonës do të përdoren për ndërtimin e 150 banesave, të cilat pritet t’u sigurojnë strehim të qëndrueshëm rreth 300 personave që përballen me vështirësi ekonomike dhe nuk kanë mundësi të sigurojnë një shtëpi.
Projekti nuk ka karakter fitimprurës. Synimi është përmirësimi i kushteve të jetesës për banorët e komunitetit, por edhe kthimi i një pjese të mbështetjes që Gavi ka marrë gjatë viteve nga njerëzit e vendlindjes së tij.
Futbollisti spanjoll ka treguar më herët se është i vetëdijshëm për vështirësitë që përballen disa prej banorëve të zonës.
“Kam parë shumë njerëz që përpiqen të mbijetojnë gjatë netëve të ftohta të dimrit, pa një çati të sigurt mbi kokë. Gjithmonë kam besuar se kam përgjegjësinë të veproj kur kam mundësinë të bëj një ndryshim”, ka deklaruar Gavi.
Mesfushori e kaloi një pjesë të rëndësishme të fëmijërisë në Los Palacios, përpara se të transferohej te Barcelona. Ai ka ruajtur një lidhje të fortë me vendlindjen dhe ka shprehur vazhdimisht mirënjohjen për familjen, miqtë dhe komunitetin që e mbështetën në hapat e parë të karrierës.