Kupa e Botës 2026 vazhdon të dhurojë surpriza të mëdha. Holanda dhe Gjermania janë eliminuar në fazën e 1/16-ave pas humbjeve dramatike me penallti ndaj Marokut dhe Paraguait.
Maroku siguroi kualifikimin në një mënyrë spektakolare ndaj Holandës. Afrikano-veriorët barazuan në minutën e 90-të pas një ndeshjeje ku për pjesën më të madhe të kohës kishin kontrollin e lojës. Në serinë e penalltive, marokenët goditën dy herë shtyllën, por gjithsesi arritën të triumfojnë në një përfundim të pabesueshëm.
El Aynaoui goditi traversën, ndërsa Kluivert u ndal nga shtylla. Verbruggen dukej se kishte pritur goditjen e Rahimit, por topi i mbetur poshtë tij përfundoi në rrjetë pas një autogoli të pazakontë me thembër. Timber gaboi për Holandën, Hakimi goditi shtyllën, ndërsa Bono priti penalltinë e Summerville. Pas barazimit 1-1 në kohën e rregullt, Maroku fitoi 4-3 në penallti dhe siguroi kalimin në fazën tjetër.
Një tjetër surprizë e madhe erdhi nga dueli mes Gjermanisë dhe Paraguait. Ndeshja përfundoi 1-1 në kohën e rregullt falë golave të Encisos në minutën e 42-të dhe Havertzit në minutën e 54-t. Gjermanët menduan se kishin gjetur golin e fitores në kohën shtesë, por realizimi i Tahut në minutën e 102-të u anulua.
Në penallti, “Mannschaft” u dorëzua përballë paraguajanëve. Golin vendimtar për kualifikimin e Amerikano-Jugorëve e shënoi Canale, duke vulosur fitoren dhe eliminimin e bujshëm të Gjermanisë nga turneu. Paraguai do të përballet në 1/8-at e finales me fituesin e sfidës Francë-Suedi.