Eliminimi i Holandës nga Kupa e Botës 2026 pas humbjes me penallti ndaj Marokut ka sjellë reagime të forta në botën e futbollit. Mes kritikëve më të ashpër ishte ish-sulmuesi suedez Zlatan Ibrahimović, i cili fajësoi drejtpërdrejt trajnerin e përfaqësueses holandeze, Ronald Koeman, për dështimin e skuadrës.
Maroku siguroi kualifikimin pas një ndeshjeje të ekuilibruar që përfundoi 1-1 pas kohës së rregullt dhe shtesave, përpara se të triumfonte në serinë e penalltive.
Duke komentuar paraqitjen e Holandës pas ndeshjes, Ibrahimovic u shpreh se nuk e kishte njohur skuadrën që tradicionalisht admirohet për stilin e saj të lojës.
“Kjo humbje është përgjegjësi e Koemanit. Nuk pashë Holandën që admiroj. Ajo humbi duke luajtur një futboll që nuk ka asgjë të përbashkët me identitetin e Portokallive dhe kjo më zemëron. Mund të humbasësh, por jo duke hequr dorë nga parimet e tua, sepse pikërisht ato e përcaktojnë një skuadër,” deklaroi ish-futbollisti suedez.
Ibrahimović kritikoi gjithashtu paraqitjen e lojtarëve holandezë, duke theksuar se skuadra nuk arriti të kontrollonte lojën dhe tregoi vështirësi në repartin ofensiv.
“Sikleti i lojtarëve ishte i dukshëm. Ata nuk kishin kontroll mbi ndeshjen, nuk arrinin të krijonin rrezik në sulm dhe performanca ishte katastrofike. Për mua, përgjegjësi kryesor është Koemani. E konsideroj plotësisht të papërshtatshëm për këtë detyrë,” u shpreh ai.
