E ardhmja e sulmuesit Ademola Lookman është ende në pikëpyetje, teksa Interi dhe Atalanta po vazhdojnë një “lojë shahu” negociatash për transferimin e tij. Sipas raportimeve të fundit nga Italia, situata është e ngrirë që nga java e kaluar, kur Interi paraqiti një ofertë prej 40 milionë eurosh, e strukturuar si huazim me detyrim blerjeje. Megjithatë, kjo ofertë është refuzuar nga Atalanta, që nuk pranon asnjë formulë që nuk nis me pagesë të plotë ose më të madhe në fazën e parë.
Atalanta mban pozicionin e saj të palëkundur duke kërkuar 50 milionë euro për kartonin e nigerianit, ndërsa Interi po mendon të rrisë ofertën deri në 45 milionë plus disa bonuse, për të kënaqur klubin bergamask dhe për ta mbyllur marrëveshjen. Ndërkohë, Lookman nuk e ka fshehur dëshirën për t’u larguar. Edhe një vit më parë, ai kërkoi transferimin dhe u përjashtua nga dy ndeshjet e para të sezonit, por më pas u rikthye si titullar në shtator.
Ndërkohë, Atletico Madrid, i cili ka shitur Lino-n, është në pritje për të ndërhyrë në bisedime. Klubi spanjoll po monitoron situatën dhe mund të bëjë një ofertë në orët apo ditët në vijim. Aktualisht, Lookman është në stërvitje nën urdhrat e trajnerit Ivan Juric dhe në dispozicion të skuadrës.
