Të gjithë e dimë se “bashkimi bën fuqinë”, dhe një gjë të tillë po e demonstron edhe skuadra e Tiranës në ndeshjet e fundit. Bardheblutë vuajtën jo pak të dielën ndaj Kukësit, por në fund arritëm që t’i buzëqeshnin 3 pikëve të radhës në kampionat. Një nga liderët e mbrojtjes së kryeqytetasve është Eni Imami, i cili është përshtatur më së miri në rolin e qendërmbrojtësit.
26-vjeçari ka rikthyer qetësinë në prapavijën e ekipit të Memës në ndeshjet e fundit, ku mungon humbja prej 4 ndeshjesh. Në një intervistë për gazetën “Koha Jonë”, Imami pranon se fitorja minimale ndaj Flamurtarit më 21 dhjetor të vitit të kaluar ishte pika e kthesës për Tiranën që ka kaluar një sezon më shumë ulje-ngritje, por që ka si objektiv për të siguruar një vend në zonën europiane.
Ndaj Kukësit ishte një ndeshje speciale për ju pasi keni qenë më parë pjesë e verilindorëve. Si ndiheni pas fitores?
E vërtet. Ishte një ndeshje speciale për mua, pasi atje kam kaluar momente të paharrueshme. Gjithsesi në fushë këto momente lihen mënjanë, pasi jemi profesionist dhe japim gjithçka për fanellën që mbajmë veshur. Fitorja e djeshme ishte e vuajtur ndaj një ekipi shumë të fortë dhe normalisht të shijon kur mund më të mirët.
Tirana ka 4 ndeshje pa humbje, çfarë ka ndryshuar në ekip në ndeshjet e fundit?
Mendoj se jemi më të bashkuar që pas fitores me Flamurtarin në fund të vitit. Është kthyer harmonia që mungonte prej kohësh dhe uroj që të zgjasë kështu deri në fund të kampionatit.
Keni provuar të luani në mesfushë dhe tani në qendër të mbrojtjes. Cili pozicion ju përshtatet më shumë?
Roli si mbrojtës qendre është një pozicion që më përshtate më mirë, pasi më pëlqen që të kem fushën përpara dhe të luajë një rol njëlloj sikur mbrojtës i majtë që kam luajtur.
Tirana për momentin mban vendin e 7-të, cilat janë objektivat në këtë sezon?
Objektivat janë që të rikuperojmë sa më shumë pikë të lëna gjatë dy fazave të para dhe gjithashtu edhe Kupa e Shqipërisë që të dërgon automatikisht në Europë.
Çdo futbollistë ka një idhull. Ju nga cili futbollist frymëzoheni në karrierën tuaj ose keni dëshirë që t’i ngjani?
Jam rritur duke parë Zidane dhe “galaktikët” e tjetër që mblodhi Real Madrid në ato kohë, por që t’i ngjaj dikujt është e vështirë. Ata janë diçka komplet tjetër, ndaj më mirë është të luaj si Eni dita-ditës dhe të luajë sa më mirë.
Shtrohet shpesh herë si temë diskutimi niveli i kampionatit. Duke qenë se ke luajtur në disa skuadra të ndryshme, mendon se niveli i kampionatit ka rënë apo është përmirësuar?
Kampionati shqiptar është i fortë, pasi për mendimin tim asnjë ekip nuk ka të sigurt asgjë. As kush bie nga kategoria, as Kupat e Europë dhe as kampionatin, ndaj është diçka pozitive që deri në fund do jetë një lufertë e fortë, çka e bën kampionatin më të bukur.
Keni menduar ndonjëherë të nisni një aventurë jashtë Shqipërisë, dhe a keni pasur ndonjë ofertë?
Një aventurë jashtë Shqipërisë do të doja shumë, por gjithsesi nuk është një obsesion, pasi futbolli është edhe fat. Vjen atëherë kur nuk e pet dhe uroj ta kem atë fat. Për momentin në kokë kam vetëm Tiranën dhe objektivat e mia janë si ato të klubit. /Koha Jone/