Humbja 2-1 e Gjermanisë ndaj Ekuadorit në ndeshjen e fundit të fazës së grupeve të Botërorit 2026 ka shkaktuar reagime të forta në futbollin gjerman, pavarësisht se “Die Mannschaft” e kishte siguruar tashmë kualifikimin për në fazën e 1/16-ave.
Ish-trajneri i Liverpool FC, Jürgen Klopp, dhe ish-kapiteni i Gjermanisë, Mats Hummels, kanë shprehur shqetësimin e tyre për paraqitjen e skuadrës së drejtuar nga Julian Nagelsmann.
Gjatë analizës së ndeshjes, Klopp vlerësoi se Gjermania zgjodhi qasjen e gabuar taktike ndaj një kundërshtari që luajti me intensitet dhe agresivitet të lartë.
“Që nga minutat e para nuk pamë një skuadër që të jepte përshtypjen se mund të shkonte larg në këtë turne. Bëmë shumë gabime dhe gjërat nuk funksionuan ashtu siç duhej”, deklaroi tekniku gjerman.
Sipas Kloppit, lojtarët gjermanë treguan mungesë iniciative në fazën sulmuese dhe u tërhoqën tepër në mbrojtje, duke i dhënë Ekuadorit kontrollin e lojës. Ai theksoi se një skuadër me pretendime për titull duhet të kombinojë cilësinë teknike me mentalitetin luftarak.
“Ekuadori luajti me më shumë pasion sepse po luftonte për kualifikimin. Gjermanisë i mungoi energjia dhe fryma e duhur konkurruese”, shtoi ai.
Klopp ngriti shqetësime edhe për humbjet e shumta të topit, veçanërisht në zona të rrezikshme të fushës, duke theksuar se gjermanët humbën shumicën e dueleve në mesfushë, gjë që i dha avantazh kundërshtarit gjatë gjithë ndeshjes.
Në të njëjtën linjë u shpreh edhe Mats Hummels, i cili e konsideroi humbjen një sinjal alarmi përpara nisjes së fazës me eliminim direkt.
“Ky rezultat duhet të shërbejë si një zgjim për ekipin. Gjermania ka cilësitë e nevojshme për të luftuar për trofeun, por duhet të rikthejë agresivitetin, intensitetin dhe disiplinën në lojë”, theksoi ish-kapiteni i kombëtares gjermane.