Konferenca për shtyp e trajnerit të Milanit, Massimiliano Allegri, në prag të ndeshjes kundër Genoas, ka qenë një pikëtakimi mes shqetësimeve për performancën aktuale të skuadrës dhe strategjive afatgjata të klubit. Ndërsa tifozët ndahen mes objektivit të kualifikimit në Champions League dhe planeve për sezonin e ardhshëm, Allegri u përpoq të fokusohej te ndeshja e radhës, por nuk mundi t’i shmangte pyetjet rreth situatës së klubit. Ai filloi me lajme pozitive për skuadrën, duke konfirmuar se Modric është në dispozicion pas provës me maskë dhe stërvitjes me ekipin, ndërsa Ricci ka pësuar një ndrydhje në kyçin e këmbës, por do të udhëtojë me skuadrën dhe gjendja e tij do të vlerësohet në mëngjesin e ndeshjes.
Për formacionin, Allegri theksoi se vetëm njëri prej Modric ose Ricci do të luajë, me Rabiot të sigurt në mesfushë dhe Jashari-Fofana kandidatë për dy vendet e tjera. Në sulm, ai njoftoi se Nkunku ose Pulisic do të startojë, ndërsa tjetri do të jetë në stol, me Santiago Gimenez si qendërsulmues titullar, ashtu si në vjeshtë. Këto detaje teknike u ndërthurën me pyetje rreth javës së trazuar, e shënuar nga zërat për një debat me Ibrahimovic dhe deklaratat e Gerry Cardinale për të ardhmen. Allegri, pa e pranuar drejtpërdrejt, la të kuptohej për një përplasje me Zlatanin, duke thënë: “Jam mësuar të kem një marrëdhënie profesionale me drejtuesit dhe pronarët me të cilët kam punuar. Brenda takimeve ka pasur gjithmonë përballje, ku mund të ishim dakord ose jo. Në një kompani ka përballje, e rëndësishme është të punohet në interes të Milanit. Në 20 vjet kam pasur diskutime shumë më të këqija, ajo që ka rëndësi është të punohet të gjithë në një drejtim të vetëm.”
Ai konfirmoi gjithashtu se ka zhvilluar një marrëdhënie personale me Gerry Cardinale, duke shtuar se fjalët e tij i kishin pëlqyer dhe se kishte biseduar me të së fundmi, duke i dhënë pikëpamjen e tij për të ardhmen. Kjo u interpretua si një sinjal i mundshëm për konfirmimin e tij për 12 muaj të tjerë. E ardhmja e Allegrit në Milan duket se do të përcaktohet nga programimi i një Milani të ri, një temë që ai e theksoi duke mbrojtur Igli Taren, i cili po flitet se do të largohet.
“Kam hyrë menjëherë në sintoni me Iglin, është një person i përgatitur. Të gjitha këto sulme…”, tha Allegri, duke lënë të kuptohet se Tare nuk i meriton ato.
Vizioni i Allegrit për të ardhmen e klubit është i qartë: ai dëshiron një shoqëri që punon së bashku për Milanin, pa egoizëm dhe personalizëm. Ky koncept u përsërit disa herë: “Milani vjen gjithmonë para gjithçkaje, të gjithë ne jemi kalimtarë. Kush kalon duhet të punojë për të lënë diçka të rëndësishme, të bëjë sezone të shkëlqyera me profesionalizëm.” Ai theksoi dallimin mes gabimeve, të cilat të gjithë i bëjnë, dhe seriozitetit e profesionalizmit që vihet në dispozicion të klubit. Allegri kërkoi nga skuadra një ndeshje me kompaktesë të madhe kundër Genoas, duke theksuar nevojën për të përmirësuar fazën mbrojtëse dhe për të menduar sa më pak për të kaluarën.
Trajneri shprehu besimin te grupi i tij i lojtarëve, duke thënë se ata janë seriozë dhe e duan shumë objektivin, pavarësisht se po vuajnë për pikët e humbura. Ai theksoi se profesionalizmi dhe angazhimi në Milan kanë qenë gjithmonë maksimalë. Për sa i përket objektivit të Champions League, Allegri pranoi se nëse nuk arrijnë atje, do të thotë se ka pasur skuadra më të mira, duke e cilësuar pjesën e dytë të sezonit si “të shëmtuar”. Megjithatë, ai mbeti optimist, duke theksuar se në futboll gjithçka mund të ndryshojë në një çast dhe se skuadra duhet të jetë e përqendruar te ndeshja e radhës me “egërsi”, rend dhe durim. Ai përmendi gjithashtu se lojtarët janë pushuar mirë gjatë tre ditëve të grumbullimit.
Marrë nga La Gazzetta dello Sport