Kosova e ka nisur me një fitore të rëndësishme aventurën në UEFA Nations League. “Dardanët” triumfuan 1-0 ndaj Irlandës në stadiumin “Fadil Vokrri”, në një sfidë që u vendos vetëm në minutat e fundit.
Heroi i mbrëmjes ishte Vedat Muriqi.
Sulmuesi i Kosovës shfrytëzoi më së miri një top të kthyer pas goditjes së Ermal Krasniqit, e cila përfundoi në traversë, duke dërguar topin në rrjetë në minutën e 82-të.
Goli i Muriqit i dha Kosovës tri pikët në startin e saj në Ligën B, duke ndezur festën në “Fadil Vokrri”.
Ndërkohë, supersfida e Ligës A mes Holandës dhe Gjermanisë në Amsterdam përfundoi në barazim 1-1. Gjermania kaloi e para në avantazh në minutën e 32-të. Felix Nmecha përfitoi nga aksioni i krijuar pas topit të dërguar në zonë për Karim Adeyemin dhe me qetësi e dërgoi topin në rrjetë.
Holanda reagoi në pjesën e dytë dhe kërkoi vazhdimisht golin e barazimit, i cili erdhi vetëm në shtesë. Ruben van Bommel dha një asist të shkëlqyer, ndërsa Cody Gakpo finalizoi aksionin duke vendosur shifrat 1-1.
Në ndeshjen tjetër të grupit, Greqia mori një fitore 2-1 në transfertën ndaj Serbisë.