Federata e Futbollit të Perusë (FPF) ka njoftuar krijimin e një fondi mbështetës prej një milion dollarësh (920,000 euro) në dispozicion të klubeve të divizionit 1/a dhe 2/a, për të përballuar krizën ekonomike nga koronavirusi.
“Ne morëm leje nga Conmebol (Konfederata e Futbollit të Amerikës së Jugut) për të shpërndarë fondet nga programit “Evolution 2020” për të mbështetur klubet tona në Liga 1 dhe Liga 2”, shkruhet në deklaratën e FPF.
Presidenti Agustín Lozano ka saktësuar se nëse në të ardhmen Conmebol dhe FIFA do të derdhin fonde të tjera për futbollin peruan, ato do të destinohen për kampionatet e Divizionit 1 dhe 2.
Javën e kaluar, Presidenti i Conmebol Alejandro Dominguez i kërkoi FIFA-s një takim të menjëhershëm për të studiuar krijimin e një fondi global për të ndihmuar federatat e prekura nga pandemia e koronavirusit. Lozano gjithashtu shpreson që ndeshjet të rifillojnë me dyer të mbyllura në korrik, por fillimisht lojtarët duhet të bëjnë të gjithë testin e Covid-19. /R.Lika-Koha Jone/
