Marash Kumbulla do të nisë këtë sezon një aventurë të re me Romën. Pas një super sezoni me Veronën, mbrojtësi është gati për të treguar vlerat e tij edhe te verdhekuqtë. Në një intervistë të dhënë së fundmi për “The Guardian” ai ka folur për këtë lëvizje të rëndësishme në karrierën e tij.
“Kur mësova se kisha një mundësi për të luajtur me Romën, nuk mu desh shumë kohë për të vendosur. E dija menjëherë se ai ishte klubi i duhur për mua. Ata më treguan projektin, stafin si dhe fola me trajnerin. Tifozët e Romës, stadiumi dhe historia e këtij klubi janë fantastikë dhe ishte shumë e lehtë për mua që të zgjidhja.
Roma për mua, është vendi ideal për të vazhduar karrierën. Cristiano Ronaldo është një kundërshtar shumë i vështirë, por munda ta limitoj atë me karakteristikat e mia. Dybala dhe Lukaku janë gjithashtu të vështirë për tu përballur. I pari për shpejtësinë e tij ndërsa i dyti për forcën e tij. Kam pasur avantazhin të luaj kundër më të mirëve në Itali në një moshë kaq të re. Kjo më ka bërë që të rritem më shpejt.
Fitorja kundër Juventusit ishte e paharrueshme për mua sepse atë ditë ishte ditëlindja ime. Nuk mund të kërkoja për një dhuratë më të mirë. Vitin e kaluar më pëlqente të shikoja Chris Smalling kur luante. Jam përpjekur të mësoj prej tij”, ka thënë Kumbulla në një intervistë për “The Guardian”.