Mungon vetëm zyrtarizimi, por në “Casa Milan” dhe “Milanello” gjithçka është gati për të festuar qëndrimin e Luka Modriçit në fanellën kuqezi. Mesfushori kroat pritet të firmosë një kontratë njëvjeçare, duke iu bashkuar skuadrës në Australi për turneun parasezonal. Për sezonin 2026-27, Modriç do të luajë “në mënyrë ekskluzive” për Milanin, pasi në fillim të tetorit do t’i japë lamtumirën kombëtares së tij. Aktualisht, ai është ende me pushime, por sinjalet e mbërritura në nivelet e larta të klubit dhe Federatës Kroate janë të qarta dhe të pakundërshtueshme.
Modriç, i cili më 9 shtator, tre ditë pas ndeshjes Juventus-Milan, do të festojë 41-vjetorin e tij, dëshiron një fund ndryshe për karrierën e tij të shkëlqyer. Ai nuk dëshiron që imazhet e fundit të jenë moskualifikimi në Champions League me “Djallin” apo zhgënjimi në raundin e 1/16-ve të Kupës së Botës kundër Portugalisë. Ai synon një trofe me Milanin, të cilit do t’i dedikohet plotësisht pas datës 6 tetor, kur do të përshëndesë Kroacinë në ndeshjen e Ligës së Kombeve kundër Spanjës, e programuar në Split. Ai tashmë ia ka komunikuar vendimin e tij trajnerit Biliç.
Ndërkohë, në Australi, Modriç pritet të gjejë edhe Estupinanin, i cili mbetet në shënjestrën e Aston Villas. Klubi anglez po bën presion për ta marrë menjëherë, por trajneri i Milanit, Amorim, dëshiron ta vlerësojë lojtarin në stërvitje përpara se të vendosë nëse do ta mbajë apo jo. Amorim e njeh Estupinanin nga përballjet në Angli gjatë sezonit 2024-25 dhe, përveç një oferte të parefuzueshme, dëshiron ta shohë në aksion, pasi gjetja e një tjetër mbrojtësi të majtë të përshtatshëm për stilin e tij të lojës nuk konsiderohet e lehtë.
Marrë nga La Gazzetta dello Sport