Lionel Messi vazhdon të jetë protagonist absolut në futbollin amerikan, por një tjetër paraqitje e tij e shkëlqyer nuk ishte e mjaftueshme për t’i dhënë fitoren Inter Miamit. Skuadra e Floridës u ndal në një barazim 2-2 ndaj Nashville, duke humbur sërish pikë në garën për objektivat e sezonit. Në qendër të vëmendjes ishte, si gjithmonë, kapiteni argjentinas.
Në minutën e 62-të, Messi mori përsipër të zgjidhte ndeshjen dhe dhuroi një moment magjik. “Pleshti” lëshoi një goditje të jashtëzakonshme nga distanca, duke e dërguar topin në rrjetë me një saktësi perfekte. Me këtë finalizim, Messi regjistroi golin e 19-të në këtë sezon, ndërsa numëron edhe 11 asistime. Shifrat e konfirmojnë edhe një herë ndikimin e tij të jashtëzakonshëm, teksa argjentinasi vijon të kryesojë renditjen e golashënuesve më të mirë në SHBA.
Por rekordi personal i mbrëmjes ishte edhe më i veçantë. Goli ndaj Nashville e çoi Messin në kuotën e 928 golave në karrierë, një shifër që vazhdon të rritet nga ndeshja në ndeshje. Pavarësisht magjisë së yllit argjentinas, Inter Miami duhet të kënaqet vetëm me një pikë.
