Vitet e fundit është rritur ndjeshëm fenomeni i futbollistëve që investojnë në klube, duke ndërtuar projekte afatgjata dhe duke siguruar ndikim edhe pas përfundimit të karrierës aktive.
Rasti më i fundit që ka rikthyer këtë trend në qendër të vëmendjes është ai i Cristiano Ronaldo. Ylli portugez ka blerë 25% të aksioneve të Almerías përmes kompanisë së tij “CR7 Sports Investments”, në një marrëveshje që llogaritet mes 20 dhe 25 milionë euro. Më herët, Ronaldo kishte siguruar edhe 15% të aksioneve të Al-Nassr FC, duke konsoliduar praninë e markës së tij në tregun e futbollit.
Një tjetër emër i madh që ka hyrë në botën e pronësisë së klubeve është Kylian Mbappé. Në vitin 2024 ai u bë aksionari kryesor me 80% të aksioneve te SM Caen. Projekti i tij synon forcimin e akademisë, stabilitet financiar dhe rikthimin e klubit në elitën e futbollit francez.
Edhe Luka Modrić ka zgjedhur të investojë në Angli, duke hyrë si aksionar minoritar te Sëansea City A.F.C., me fokus në rritjen e imazhit ndërkombëtar dhe konsolidimin ekonomik të klubit.
Në Amerikën Latine, Lionel Messi dhe Luis Suárez themeluan në vitin 2025 klubin Deportivo në Uruguai. Projekti ka siguruar tashmë ngjitjen e parë dhe synon të bëhet një pikë referimi për futbollin vendas.
Ndërkohë, portieri belg Thibaut Courtois u bë aksionar strategjik i Le Mans përmes platformës “NxtPlay Capital”, në kuadër të një plani zhvillimi afatgjatë.
Në Belgjikë, N’Golo Kante bleu 100% të aksioneve të Royal Excelsior Virton, duke shpëtuar klubin nga vështirësitë financiare dhe duke investuar në rritjen e talenteve të rinj.
Së fundmi, edhe Vinícius Junior, së bashku me investitorë brazilianë dhe spanjollë, mori rreth 80% të aksioneve të Alverca, me synimin për ta shndërruar klubin portugez në një qendër të rëndësishme për zhvillimin e lojtarëve të rinj.
