Një mënyrë e pazakontë e ekzekutimit të penalltisë ka bërë xhiron e rrjeteve sociale, por përfundimi ishte një dështim total. Trayvone Reid, anësori i skuadrës xhamajkane Mount Pleasant, është kthyer në objekt talljeje pasi tentativa e tij nga pika e bardhë përfundoi me një pritje të lehtë nga portieri kundërshtar.
Ngjarja ndodhi të mërkurën në mbrëmje, në përballjen ndaj Club Sando, e vlefshme për Kupën e Karaibeve. Mount Pleasant kishte kaluar në avantazh 1-0 me golin e Warner Brown, përpara se të fitonte një penallti në minutën e 35-të, pas prekjes së topit me dorë nga një lojtar kundërshtar brenda zonës së rreptësisë.
Reid mori përsipër ekzekutimin, por mënyra se si iu afrua topit ishte ajo që tërhoqi vëmendjen e të gjithëve. Futbollisti lëvizi drejt topit me hapa jashtëzakonisht të ngadaltë, thuajse në lëvizje të ngadaltë, duke tentuar një mënyrë të veçantë për të hutuar portierin.
Megjithatë, taktika e tij nuk funksionoi. Reid goditi topin drejt qendrës së portës, me një gjuajtje të ulët dhe pa forcën e nevojshme për të rrezikuar seriozisht kundërshtarin.
Portieri i Club Sando, Tershorne Ragoo, e kuptoi lehtësisht drejtimin e goditjes dhe arriti ta ndalte pa vështirësi, duke mbajtur skuadrën e tij në lojë.
Stop what you're doing and watch this unreal penalty from the Caribbean Cup pic.twitter.com/iqFdr1gPDL
— WiZi (@WiZiCFC) October 15, 2026